外國月亮係咪特別圓？功夫茶唔知，淨係知道一樣嘢，喺好多人心目中，外國琴音特別勁！
有一件事真係好鬼死激氣，未必算係「華人與狗不准入內」，不過仍然可以話係「華人與琴不得上台」。西九文化區用地首次外借搞活動，由盛事基金贊助、香港爵士樂會主辦嘅「香港國際爵士音樂節」，居然爆出歧視本地樂手醜聞。
為期八日嘅音樂節，重頭戲係前日開始喺西九文化區舉行嘅爵士音樂會，總共有十九支外國樂隊以及七支本地樂隊參與。演出場地包括方形舞台、圓形舞台同流動舞台。方形舞台係收費區，入場費五百八十元，兩日票一千元。方形舞台好矜貴㗎，唔止觀眾要畀錢先至可以入場，而且只容許外國樂隊上台表演，土炮琴師樂手一律免問。如果你係本地薑，你嘅容身之所係免費嘅圓形舞台同流動舞台。
本來呢，身處免費區表演都冇乜所謂，獨樂樂不如眾樂樂吖嘛。問題係，所謂流動舞台原來係簡陋到不堪嘅涼亭！
喂，本地樂隊有尊嚴㗎，你叫佢哋去涼亭表演爵士樂，係咪侮辱得交關呀？更何況呢兩日打風落雨，露天環境何來知音觀眾呢？所以咯喎，兩支本地樂隊一怒之下罷演。
罷演樂隊Young Cats Quartet嘅鼓手Almond係咁講嘅：「我接受大細超，但諗唔到要喺涼亭演出，涼亭兩邊有長櫈，前面又有垃圾桶，同一個真正舞台差好遠！」另一罷演樂隊Hi-Tone嘅鋼琴手古馳仲爆料，當佢哋向主辦單位反映不滿嘅時候，有人態度好囂咁話：「你鍾意玩就玩，唔玩就算！」
唉，今時今日乜嘢世紀呀？辛亥革命都一百周年紀念啦，香港十四年前已經唔係英國殖民地，家陣仲歧視「華人與琴」真係老土到痹。計功夫茶話齋，一直游手好閒冇乜貢獻嘅平等機會委員會，不妨向西九文化區了解了解，睇下有冇人企圖將呢一塊土地劃做有辱斯文嘅「外國租界」。
講開又講，自從唐英年辭職考慮參選特首，政務司司長嗰一張空櫈，一嘢改由民望低到冇朋友嘅林瑞麟坐正，而啱啱遇着剛剛，西九文化區管理局董事局主席係政務司司長。功夫茶想問一問林公公，閣下到底有冇能力管好西九？有冇決心杜絕歧視行為？你知啦，「宦官之亂」呢家嘢確係非常之咁令人擔心，中國當年處處被殖民都離唔開呢個敗家原因咋。
總而言之，人有人格，港有港格，理應最講文化嘅西九切忌衰衰格格！