消防員嘅天職係乜呢？當然係救火啦，之不過有一件事相當抵死，消防處經常變身惹火尤物，火勢有時都幾猛o架。
呢嗱嗱嗱，消防處又起火嘞，起火原因同「火遮眼」有關。事緣處長盧振雄退休在即，各總區陸續舉行歡送活動，其中九龍總區喺九龍塘消防局為呢位一哥舉行「告別探訪座談會」，有消防員吐苦水話被迫出席，而且歡送活動有公器私用之嫌，咁咪激到人哋怒火中燒玩踢爆囉。
活動過程係咁嘅，當日陸續有疑似消防人員到場，部分身穿全套筆挺西裝，聽講又係被迫着到咁鬼死隆重。現場所見咯喎，盧振雄嘅ＡＭ２７座駕以及多部Ｆ字頭私家車佔用局內原本停泊消防車嘅位置，有消防車懷疑因此而被迫駛走。
另外，局內一架升降台消防車橫泊空地，並且掛上「歡送盧振雄處長告別探訪九龍總區」橫額，淪為一眾大人物拍攝大合照嘅大型布景板。你知啦，消防車應該隨時候命出發救人，一旦挪作別用成為攝影道具，你都咪話唔係公器私用。
大家睇到呢度，係咪覺得好有擦鞋味道呢？冇錯嘞，資深消防人員指出，相信係個別中層人員有意無意出言施壓，不排除有人怕影響每年考核，惟有無奈赴會。
講到擦鞋，原來官場中人非常之咁熱衷此道。政府統計處處長馮興宏又係即將退休，下屬又係舉行歡送活動，自稱「一群憤怒鳥」嘅員工向傳媒發出一封名為「處長走了，同事破財了」嘅投訴信，內容大致係話員工又係被迫參加。
更加離譜嘅係，統計處部門秘書公然出通告，「誠邀」員工集資購買禮物送贈處長。雖然通告話集資係「自願性質」，不過大家心知肚明，唔自願即係唔畀面，唔畀面即係唔擦鞋，唔擦鞋嘅後果可大可小，隨時仕途崎嶇到一仆一碌。
話時話，處長如果接受下屬送贈厚禮，得唔得o架？會唔會構成利益輸送o架？功夫茶強烈忠告馮處長三思，臨天光瀨到一褲都係就唔好啦。
擦鞋呢家嘢，雖然話係歷史悠久嘅中華傳統啫，之但係此風實在不可長。你知啦，擦鞋擦到一個程度就會出現貪污腐敗，正如神州大地，一個二個貪贓枉法嘅狗官咪就係擦鞋文化嘅產品囉。
所以咯喎，功夫茶奉勸各位肉麻當有趣嘅官場擦鞋仔，討好上司記住拿捏分寸，假如真係導致利益輸送，監都有得坐！
消防處又好，統計處都好，擦鞋還擦鞋，千祈唔好將香港搞到變番一個逢官必貪嘅腐敗之都！