混血E神戴納上身

講起英超史篤城，你會諗起啲乜？拿仁就即時諗起戴納掟「手榴彈」，同埋硬淨到暈嘅踢法，真係炸唔死你都撞散你，一句講晒即係爛仔波。不過，掟界外球其實都可以好優雅嘅，今期《球愛敢死隊》就請來「混血E神」林宜芝（Monna），親身示範點掟「索爆界外球」，睇完因住畀佢冧到流鼻血呀！

掌握秘技一學就識

Monna身形高挑骨架靚極，五官標致對眼好似識笑一樣，難怪可以喺「o靚模界」迅速走紅，呢名靚女真係注定食呢行飯。雖然自小唔鍾意做運動，但足球壇不乏靚仔，而佢同好多女仔一樣，都有留意大型足球盛事，當中佢對掟「手榴彈」最感興趣，知道拿仁今日會教佢呢瓣，開心得手舞足蹈，即時拎起個波亂咁掟，但係阿Monna姐，你又趷腳個波又唔過頭，雖然你靚啫，落到場都實畀球證foul到暈啦！

身為導師，拿仁當然要話畀Monna知關於擲界外球嘅球例，而Monna全程眼仔碌碌咁聽到實，認真乖女。好喇！當知道掟「手榴彈」嘅秘技後，Monna就信心十足開始「戴納上身」，先抽起自己件背心仔抹乾淨個波，之後快速地將皮球擺於後腦位置，踏順步韻雙手拉直向前一掟，個波一支箭咁飛埋拿仁嗰度！好彩小弟眼定定睇實之餘，仲保持到少許反應，僅僅避得開呢個極速皮球，唔係仲肯定食晒波餅！

Monna擲彈真人騷 步驟1．用波衫抹乾淨個波以防跣手。	步驟2．將個波放在後腦位置，眼看四方。	步驟3．踏順步韻，注意唔好趷腳。
步驟4．儲足力量，踏前一步。	步驟5．伸直雙臂，奮力向前掟，得咗！

周身都係運動細胞

Monna話就話冇運動開，但其實周身都係體育細胞，唔係點會咁快上手先？Monna學曉後大叫好玩，問佢怕唔怕會掟到對手臂粗晒先？小妮子即時話唔怕，仲話掟得多肯定唔會有byebye肉添！好啦，下次師傅我比賽時就叫埋你，有你在陣，對手掛住瞄女，我仲唔入多兩粒？

圖：司徒子文