政情：徐美琪別墅改建龕場

原來龕場前身係Margaret七、八年前買返嚟嘅私人別墅，諗住退休後歎下，點知三年前因先生過身無返別墅一排，先發現原來四周已經起晒做精舍，唔係咁適合住。Margaret問過朋友，知道別墅地段都合適做靈灰安置所，於是參與埋一份。

Margaret早前喺慈善節目表演跳舞時不慎走光都堅持完成，為善最樂嘅性格可見一斑。佢話，好多人搞龕場係為利，但佢覺得係回饋社會嘅一種方式，自己除咗每日捐一千蚊畀慈善團體外，龕場部分收入仲會捐畀保良局，希望逝者有好歸宿之餘，生者都能獲得幫助。