雖則橋唔怕舊，但都要受至得。財政司司長「鬍鬚曾」曾俊華可能唔係咁清楚自己個仔「日仔」受歡迎程度有限，作為親生老竇嘅佢尋日喺網誌透露，來自二○二八年嘅日仔今年又喺財政預算案之前向市民諮詢意見，前年先喺未來返到金融海嘯年代嘅日仔今年已經超現實火速大學畢業，但唔好彩喺求職路遇挫折，仲一度心灰意冷。日仔點搵工係後話，要先浪費筆公帑畫漫畫先慘，鬍鬚曾到底咩預算呢？
鬍鬚曾前年開始用漫畫故事向公眾諮詢預算案，舊年添食，但估唔到未夠皮，今年再嚟。鬍鬚曾話，今集漫畫以「擁抱明日，信有晴天」為題，日仔繼續擔正，亦已走出校門，但在求職路上遇到挫折，加上家庭壓力，一度心灰意冷，最後憑對未來嘅信心，終於渡過難關，仲積極參與一場關係到自己未來嘅比賽。
講就易，現實世界青年失業率唔見回落，雖然今集由年輕漫畫家馬遜執筆，但反應有幾好大家慢慢睇啦！