政情：梁美芬組黨夢難圓
近期政黨離合之事特別多，繼匯賢智庫葉劉淑儀牽頭組成新民黨後，建制派另一女將九龍西梁美芬尋日亦自透露口風，旗下西九新動力內部研究同專業會議合組政黨！不過神女有心，都要睇三位襄王有冇意思，其中工程界何鍾泰回應話，完全無諗過！答案不言而喻。
梁美芬既係西九新動力主席，亦係專業會議成員，同議會內嘅地產建造界石禮謙、建築測量及都市規劃界劉秀成同何鍾泰，組成「4P」，身份重疊，不過，論親疏及影響力，西九新動力先至係佢嘅真正班底，專業會議則屬鬆散合作模式。
梁美芬尋日同傳媒聚會時主動透露，鑑於政改後嘅新形勢，西九新動力內部曾經討論，係咪應該同專業會議組黨，將兩股力量集結為一。嘩，如果兩幅招牌成功拼構，就會瞬間變成一個擁有四位立法會議員同三十幾名區議員嘅中型政黨，正如梁美芬尋日所講，專業會議變政黨，4P投票一致，以後同政府就某啲政策討價還價都有力啲，直選方面又可起協同效應，實力不容小覷喎。
西九新動力未有共識
不過，數學上計得掂嘅方程式，放喺政治現實，情況就好唔同。西九新動力同專業會議呢艘組黨夢想號，似乎只有梁美芬孤身獨航，其他人都無意玩埋一份，就連西九新動力內部，都有不同意見。梁美芬話，西九新動力對組黨未有共識，事關旗下有實力嘅區議員，擔心政黨背景反成競選包袱，唔少人都有保留。
牽頭組黨，由無變有，係好多政界人士嘅夢想，不過，神女有心，襄王又點睇呢？何鍾泰接受查詢時話，西九新動力、專業會議同佢旗下嘅工程界社促會，三個單位未來會有好多合作空間，好似早前就聯手發起關注油麻地避風塘水質問題運動，不過，講到組黨，佢話：「我哋無傾過，亦無諗過！」又指組黨非簡單之事，記者突然要佢表態，「生勾勾，唔知點答。」其實，何鍾泰嘅答案已經呼之欲出啦！
據悉，葉劉籌組新民黨時，亦曾敲過專業會議嘅門，四人全部耍手擰頭，其中一個原因，就係有人唔鍾意組黨，既然對葉劉嘅招手無動於衷，咁又點會畀梁美芬忽然感動呢！