中環出更：蔡冠深大宅開P以樂會友
中華總商會會長蔡冠深同太太蔡關穎琴交遊廣闊，相識滿天下。上星期二夜晚，蔡家位於山頂道嘅大宅琴心園（Chateau de Piano）車水馬龍，出入嘅城中名人非富則貴，原來係出席佢哋舉行嘅家宴，場面盛大。
當晚逾二百五十嘉賓出席，現場冠蓋雲集，包括中聯辦副主任黎桂康、外交部駐港副特派員高玉琛、諾貝爾獎得主楊振寧夫婦、霍英東集團主席霍震霆等。由於蔡冠深做過剛果民主共和國駐港名譽領事，同各國駐港領事關係好，所以當晚有卅幾位駐港總領事伉儷及名譽領事到場，包括英、德、瑞士、韓國、新西蘭及新加坡等。
蔡太話畀卓妮聽，佢哋年年都會喺屋企搞周年酒會同各方好友迎賀聖誕新年。晚宴嘅重點唔係食嘢，而係由四場唔同嘅音樂表演連貫。往年鋼琴王子郎朗、大提琴好手李垂誼都係表演嘉賓，今年就有香港節慶管弦樂團音樂總監李承謙率領四名學生演奏，又有靚女鋼琴家余嘉露表演。由蔡太一手包辦嘅自助式美酒佳餚當前，又有悠揚樂聲伴隨，賓客都盡興而歸。