中環出更：楊敏德着「非賣品」開行會

卓妮尋日上政府總部趁熱鬧，見到有「棉花公主」之稱嘅行會成員楊敏德，着住一身黑衫黑褲裝束，原來呢套係Vivienne Tam嘅「非賣品」嚟㗎。

Vivienne Tam送贈

尋日朝早氣溫得廿度左右，幾位女行會成員都穿上外套禦寒，好似查史美倫就一身淡紫色，莊重得嚟唔會太沉悶。素來鍾情本地設計師手筆嘅楊敏德，穿上一件以黑色為主色、並以一個個金色四方形牌點綴嘅中式衫，每個牌上仲印有人像添。楊敏德話畀卓妮知，件衫係Vivienne Tam送畀佢嘅，相信件衫只係Vivienne Tam做嚟玩吓嘅啫，坊間應該無得賣。

Vivienne Tam係港產嘅國際著名女設計師，佢嘅「非賣品」設計肯定價值不菲，難得楊敏德着出嚟畀大家一齊欣賞。

話時話，下個月就係行會成員劉遵義同太太麥嘉軒結婚一周年紀念，尋日卓妮問佢點樣慶祝，劉遵義淨係靦覥話會慶祝。咁會唔會去旅行慶祝呢？佢話有可能。雖然佢都唔多想講嘢，但就一臉甜蜜。