立法會選舉緊接區議會選舉，各黨派嚟緊喺區選取得嘅議席，某程度上係為來年立法會選舉鋪路，因為區議員係重要樁腳，無論建制或泛民陣營各自內部都要爭崩頭出選。好似東區丹拿選區，根據建制派嘅協調機制，理應係由自由黨現任區議員李汝大交棒畀同黨嘅曾卓怡，點知新民黨中途派出教聯會副主席王惠成殺入該區，結果引來自由黨不滿兼準備全面還擊。不過，最近突然傳出王惠成退出嘅消息，莫非係想息事寧人？
之前兩黨為咗丹拿選區鬧大交，有自由黨高層仲喺社交網站高調發文，指該黨有人喺太古城東選區為大家服務，而太古城東選區嘅現任區議員就係新民黨謝子祺，擺明係想宣戰。據悉，最新發展係王惠成決定退出丹拿選區，主因係經過民意調查後，王惠成嘅支持度較低，需按照協調原則退出。亦有指王惠成踩入丹拿選區本身已經違反協調機制，佢本人亦覺得無謂累鬥累。究竟係因為民調定個人因素而退出，就真係得佢先知喇。