中環出更：李漢城倡新一代學普通話
職業訓練局尋日喺灣仔會展舉行畢業典禮，今年又有一大批生力軍投入社會工作，當中唔少係酒店及餐飲業專才。尋日仲有八位社會知名人士獲頒榮譽院士銜，包括香港酒店業主聯會執行總幹事李漢城，佢話酒店業界一定會吸納呢批畢業專才，但為迎合內地旅客要求，佢寄語畢業生要學好普通話，而中華廚藝學院正開創八大中菜菜式吸引內地客。
李漢城話，年輕人要加入酒店業發展，除咗要有良好英語水平，普通話都好重要，事關現時酒店業有六成生意都係靠內地客，幾乎支撐住成個酒店業，有流利普通話才能為內地旅客提供優質服務。李漢城仲身兼中華廚藝學院訓練委員會成員，最近因應內地旅客口味，廚藝學院正開創八大中菜菜式，包括鴨腳包及金錢雞，遲啲仲會出書推介。
李漢城平時工作忙到無時間四圍搵好嘢食，但對酒店食肆瞭如指掌，不忘為旅客發掘新菜式，獲頒榮譽院士實至名歸。卓妮問李漢城最鍾意食乜，原來佢至愛東坡肉，雖知東坡肉油膩唔健康，但忍唔到口無辦法，惟有盡量食少啲，多做運動！