中環出更：閉關湊孫為樂四叔唔講股
香港青年協會前晚喺會展舉行開心派對，力邀城中名人載歌載舞同賀五十歲生日，畀面撐場嘅賓客多達六百人。唱開聖詩嘅教統會主席鄭慕智以激昂勵志嘅《You Raise Me Up》為晚宴揭開序幕，跟住係唔做歌星做高官嘅民政事務局常秘楊立門，佢把靚聲直逼四大天王，聽得現場賓客拍掌叫好，主持人仲封佢做「AO（政務官）黎明」添。全場最抵讚嘅梗係「四叔」恒基地產主席李兆基，佢犧牲弄孫之樂撐足成晚，一點疲態都冇，果然係人逢喜事精神爽！
四叔一向好支持青協，多年前已捐建咗青協李兆基中學等兩所學校，前晚喺恒地大內總管林高演陪同下，瞓身撐到散場，認真唔話得。自從四叔大仔李家傑喜獲三名精靈趣致嘅BB仔之後，都未見四叔企出來同大家分享喜悅。前晚難得見到佢，卓妮梗要第一時間送上祝賀，順便問佢湊孫開唔開心。
四叔一聽到孫仔就連聲講多謝，又笑得好滿足咁話：「好開心，一得閒就去同佢哋玩啦。」見佢成個慈祥爺爺嘅冧樣，唔使講實錫孫錫到燶啦！近排股市風高浪急，卓妮把握機會問佢最近買股票嘅心得，點知四叔好鬼馬咁話：「冇意見！呢排閉關。」四叔真係識講笑，卓妮知佢每日靜坐養生就真，閉關反而未聽過。
青協開P 粒粒皆星
講番當晚老中青三代同堂嘅歡樂派對，節目生動活潑，現場笑聲不斷。鄭慕智以唱聖詩嘅氣勢打頭炮，中氣十足，贏盡掌聲。卓妮問佢練咗幾耐，佢一派氣定神閒：「唔使練，冇練過！」果然係唱得之人。馬會大董周永健就攞番塵封四十年嘅舊相，重現當年佢同歌壇長青樹譚詠麟加入青協夾Band嘅歷史，一張張泛黃嘅照片帶領眾人穿梭時光隧道，令人回味無窮，亦都證明佢撐足青協四十年。
當晚出席者粒粒皆星，中聯辦主任彭清華、煲呔曾同一眾政府高官空群而出，包括教育局局長孫明揚、勞工及福利局局長張建宗、發展局局長林鄭月娥等。久未露面嘅前最高法院首席法官楊鐵樑都現身撐場。「最靚港姐」朱玲玲亦同老公拍拖而至，笑言支持青年活動係佢嘅承諾喎！
卓妮