政情：葉劉搞新民黨一個嬲字
匯賢智庫創辦人兼立法會議員葉劉淑儀組黨一事已成定局，葉太尋日同我哋講，已敲定下月九日喺柴灣青年廣場搞新黨成立典禮，到時會同大家介紹新黨高層同創黨成員，包括兩名黨副主席，而前自由黨常委田北辰會否正式「嫁入」葉太嘅新民黨，屆時自有分曉。不過葉太就率先漏口風，話成立典禮當日，田二少「肯定會到」，仲神神秘秘話會有星級人馬出席，不過就唔肯講係邊個。
新民黨係政改之後第一個新成立嘅政黨，必定成為政壇亮點。葉太話當日除咗黨員之外，會請三百幾個嘉賓，請帖已經印好晒，下星期大家就會收到，不過因為設計請帖嘅時候仲未同田二少傾加盟之事，所以英雄帖上就冇二少個名嘞。但原來最初葉太屬意聖誕節前搞成立典禮，不過發現好多朋友一早計劃去旅行，搞到冇人得閒嚟先決定改期，正好迎上田二少「改嫁」事件，錯有錯着，到時場面一定更盛大。
依家新民黨創黨黨員只有幾十人，同葉太早前講嘅三、四百人有一段距離，但葉太一啲都唔擔心，因為連佢自己都未交入會表格，相信建立好黨內架構後，到時人數一定會達標。
至於各界關注嘅黨領導層，葉太話就要經過民主程序選出，下星期新民黨會召開首次黨員大會，選出中央委員會成員，再由中委互選出一名主席、兩名副主席及執行委員會成員。本身係新民黨召集人嘅葉太同史泰祖，當然係正、副主席呼聲最高嘅人選，至於臨時「打尖」嘅二少會唔會一如外界所料，成為另一個副主席，葉太就話要畀番會員決定。不過佢話二少有承擔搞直選，絕對有條件勝任喎。
成立當日不宜「嫁娶」
睇番通勝，發現一月九日宜訂盟、掛匾，相信葉太揀呢日開張都係諗過度過，希望新民黨事事順利。不過睇真啲，原來當日同時忌嫁娶，葉太同二少一直用「婚嫁」、「相睇」嚟形容大家嘅關係，葉太加上二少同史醫生，兩男一女湊成一個「嬲」字，睇嚟為將來發展，寧願信其有，應該改口唔好再用結婚做比喻嘞！