有人說：人在江湖，身不由己；人在婚姻，愛不由己；人在官場，話不由己；人在單位，事不由己；人在世上，命不由己……總之，好多嘢只要你唔上心，大抵都不會失眠。
好似最近有八千隻內地入口嘅冰鮮雞，被食環署驗出含殘餘獸藥，若然孕婦食咗未煮熟嘅含藥雞隻，胎兒骨骼發育可能受影響。呢批「獸藥冰鮮雞」七月下旬已到港，事隔四十多日才有檢測結果，嘩！乜鬼都食晒落肚化作春泥更護花喇。之不過，食衞局局長周一鑊強調，至目前都冇人投訴，即係大家日日食「獸藥冰鮮雞」都冇事嘅。
周局長深明「人在官場，話不由己」之理；要佢為食物安全把關，根據過往經驗，睇怕都難矣！依周局長嘅邏輯，冇人投訴即係可安心食用「獸藥冰鮮雞」，嘻嘻，所謂希望，不是明天的到來，而是所有的日子都會過去。
所有的日子都會過去，那就不要把甚麼慘劇當成教訓。人在世上，命不由己，是的，引而伸之，樹在斜坡，塌不由己，塌樹意外很快也就會過去。摩士公園一個斜坡，發生受真菌感染的台灣相思樹塌下，壓扁兩部的士車頂，一名司機幸未爆頭，僅腰及頸扭傷；另一司機竟然冇事。台灣相思，樹如其名，塌下都念及他人安危，果然值得相思。
今趟塌樹意外，樹木辦人員到場調查，發現塌樹的地方屬康文署管理，而該樹則屬建築署擁有。政出多門，話就話三部門孭鑊，到頭來又係冇人要孭鑊，這就叫作「人在單位，事不由己」。做官其實很簡單，即使死人塌樹，只要堅持一切「人在世上，命不由己」，日子便好過！