80後兄弟檔捱出第一桶金
「返工都忍唔住喊，差啲想摺（結束）咗間公司，但決定咗，死就死啦！」一對生於八十後、香港科技大學畢業的兄弟，只因即興，放棄高薪厚職的中產生活，創立應用程式開發公司，誰料卻過了十八個月無糧出的「無地自容」日子，幸一天突靈機一觸，創設Facebook小測驗及成分分析器等應用程式，終見成績，如今網民常玩的「虎年運程」分析也源自該平台。公司現共設有四種分析器，共錄得逾二千萬瀏覽次數，保守估計今年可有逾四百萬元營業額。他們勉勵同輩：「行一步起碼有百分一機會，一步都唔行就乜都冇！」
現年廿八歲的曾建中及廿七歲的弟弟曾建豪，○六年一同畢業於科大的土木工程系碩士課程及計算機科學系學士課程。哥哥畢業後曾任月入三萬多元的銀行推銷員，弟弟則任電腦程式員，平均每月更有四萬多元薪金。兩兄弟笑言只因當日鹵莽一句：「開公司囉！」便毅然辭職，在毫無資金儲備下創立自家公司Pencake Limited，兄長負責宣傳，弟弟則編寫程式。
21個月冇畀家用 茫然飲泣
鹵莽創業難免遇財困，二人最高紀錄曾十八個月無糧出，他們均說：「當我超過廿一個月冇畀家用時，連阿媽都求我放棄，叫我唔好再發癲。」兄長曾建中坦言曾感前路茫茫，上班途上更獨自飲泣：「好忟！明明有能力，但又唔知點做；再眼見啲同學考晒牌，家陣人哋月入五萬，我就五千蚊都冇，好自卑！諗過執咗間公司再搵工。」
至○八年六月，成功申請資助進駐科學園後，期間遇上Facebook流行小遊戲，他們靈機一觸編寫「香港投票站」應用程式，讓玩家可自創投票內容，投票站更入選香港科技及資訊獎五強，吸引不少商場、機構洽談網上宣傳，事業始見起步。
如今公司已設立「五人分析器」及「心理測驗」等多個應用程式，每個程式平均每月有六百萬至八百萬點擊人次，公司每月有約四十萬元營業額，合計其他廣告計劃，保守估計今年可望有四百萬元營業額。
大膽嘗新 鼓勵踏出第一步
兩兄弟大膽嘗新，見盡大起大跌，終於脫離創業險境，但仍不忘自我提醒要居安思危。他們無悔當年「鹵莽的決定」，還鼓勵「八十後」同輩踏出第一步：「老土啲計埋數畀你！行一步，起碼有百分之一成功機會，一步都唔行，就注定食白果！」
記者戴碧怡