公爵熱爆畢勝無歸
明早因為有備受矚目嘅NCAA總決賽上演，因此連NBA都要讓路休戰一天。今屆NCAA總決賽由北卡羅萊納嘅老牌勁旅公爵對來自印第安納州嘅新丁畢拿，比賽地點係印第安納波里斯市嘅中立場。公爵曾3奪NCAA總冠軍，今次以大熱姿態打入決賽，而畢拿只係以西部第5名身份爆冷晉級，過去從未贏過冠軍，若成功捧盃嘅話，肯定係NCAA近年最大冷門。 （周二早上9時15分開賽）
論名氣，公爵同畢拿可謂差天共地，公爵曾9入總決賽，其中91、92同01年捧盃，陣中「3S」辛格拿（Kyle Singler）、路蘭史密夫（Nolan Smith）及舒希耶（Jon Scheyer），都被視為有實力進軍NBA嘅明日之星。
雷霆劏牛殺入季後賽
公爵晉級過程順利，四強戰大勝西維珍尼亞21分，而公爵今屆無論主場或中立場都未嘗一敗，可謂霸氣十足。至於畢拿晉級過程場場都贏得驚險，四強戰險勝密歇根州立2分，今場面對實力強橫嘅公爵，睇怕再冇奇迹。
至於昨日NBA戰果，雷霆以121:116擊敗小牛，奠定季後賽資格。目前西岸8支季後賽球隊已確定，餘下常規賽只係名次之爭，而東岸則只有4隊落實出線，其餘席位仲有排爭。