政情：曾德成唔熟投資卸膊露底

民政事務局早前決定向「藝術及體育發展基金」注資卅億元作為種子基金，預計每年可有百分之五回報。尋日喺立法會特別財委會上，工業界議員林大輝向民政事務局局長曾德成提出質疑，話依家息口咁低，加上投資呢家嘢可升可跌，點解佢咁有信心每年可穩袋百分之五嘅回報？點知德成局長即刻卸膊兼露底，話民政局只係識文藝、運動同宗教嘅嘢，呢個回報率都係港府金融人士計番嚟喎。其實曾德成做得局長，即使對投資唔熟悉，都理應對局內政策有透徹嘅理解同承擔，佢咁講真係好不負責任囉！