笑看天下:港人唔病死就係窮死

港府防疫漏洞處處,一味靠嚇懲罰市民,執法又方寸大亂,完全不到位,依家唔好話清零無望,睇怕疫情會由聖誕爆到新年!大家每日打開報紙,映入眼簾嘅都係防疫抗疫嘅負面新聞,依家連亞博檢疫中心都失守,日前疑有3名職工中招,其中一人保護衣或有破損!又如油麻地梁顯利社區中心有「走漏」個案,一名高危群組人士日前去過該社區中心檢測呈陽性,中心卻無法喺電腦系統找回其資料,是以未能通知檢測者,只好呼籲該段時間曾到該中心檢驗嘅人,如未收到陰性結果通知,應再次檢測!

咁多烏龍甩轆,難怪社區爆發潛在風險,葵盛西邨同層5伙12人確診已響起警號!而聖誕假期將至,將有大批海外留學生返港,本港疫情料再添變數。政府顧問專家都指出,機場入境存在4大漏洞,包括樣本瓶無刻度、檢測前容許進食、行李運輸播毒、安檢膠盤重用;要言之,防疫意識仲衰過牛棚困貓!

疫情惡化,本周五開始提高禁聚令等防疫規例定額罰款,由2,000蚊加至5,000蚊,不過,外傭聚集嘅熱門地點,喺剛過去嘅周日,警方都係齋派傳單而無執法,部分外傭依然冇戴口罩,甚至圍聚煲煙、勁歌熱舞,政府若然得個講字而唔認真執法,又係廢!

最不可思議嘅,就係本報踢爆漁護署失職,由佢哋負責管理嘅香港仔魚市場有如無掩雞籠,視禁聚令如無物:進出市場不用量體溫,魚販、南亞裔司機多數冇戴口罩,亦有6人聚餐!阿哥,一個魚市場缺口,分分鐘累全港埋單,防疫處處穿窿,唔怪之得咁多人返鄉下避疫啦!深圳灣口岸逼爆,福田隔離酒店冇房,政府防疫無能,仲唔係懲罰市民?咁搞法,疫情失控,打殘各行各業,大家見面唔係問飲咗茶未、食咗飯未?而係問你失業未呀?政府再等運到而唔果斷實施全民強檢或採閉密式管理,香港人唔係病死就係窮死!