政情：公民講場：逾百公廁 十年冇翻新 劉利群慢吞吞捱轟

食物環境衞生署被踢爆其管理嘅近八百個公廁有兩成半超過十年冇翻新過，部分更係長達十八年都冇執吓，唔怪得本港公廁經常為人詬病，甚至影響香港旅遊聲譽。立法會政府帳目委員會尋日就此開會審食環署，署長劉利群當然都冇得避要出席，佢聲言部門正積極加快公廁重建同翻新，會用六億元喺未來五年翻新二百多間公廁兼引入高科技去做喎。有議員批評該署「後知後覺」，直言自清朝起已經有公廁，唔明點解到依家都冇完善嘅檢查及測試系統同政策。話時話，政府應該柯打劉利群等官員每日去一次公廁巡視，相信可以加快改善公廁環境。