政情：落選老將唔再選 黃嘉榮退出政壇

蘇西智欲培育新血

○八年起成為沙田區議員、已六十三歲嘅黃嘉榮喺敗選後傳出佢退出新民黨嘅消息。佢尋日就話，退黨一事未落實，佢亦唔係不滿新民黨，只係建制派喺區選中落敗，令佢唔想再踏足政治，而去到呢個年紀，都係時候退出政壇喎。

同樣連任失敗嘅蘇西智擔任區議員至今已廿五年，佢都話下屆應該唔會再選，但未來都會繼續協助其所屬政黨培育新血，而只要社區需要佢，佢都會繼續幫大家處理生活上嘅問題咁話。而周奕希喺三十一年議會生涯中曾任區議會正、副主席，呢次區選就不敵民主派政治素人，已六十二歲嘅佢亦都話唔會再參選喇，但就依然都會服務街坊嘅。