政情：轟7大吉祥物無影 陳凱欣促跨部門撐警
香港亂局爆發咗五個幾月，政府被指冇用盡方法去止暴制亂。立法會議員陳凱欣尋日喺大會發言時批評政府喺網上宣傳平亂訊息不力，仲鬧政府點解無好好咁善用七大吉祥物，再嚟多次「跨部門合作」幫吓警隊手！
曾仿超級英雄 組聯盟換新相
陳凱欣話，包括大家好熟悉嘅任何仁、大嘥鬼、清潔龍阿德在內，七個政府部門吉祥物曾經喺四月嘅時候，無事無幹、無風無浪，食住超級英雄電影嘅熱潮，約埋同一日換新相組成聯盟，「一個人嘅力量有限，但只要齊心，香港人就有無限動力。」佢仲引用咗食環署「清潔龍阿德」當時所寫嘅說話，但就炮轟呢七隻吉祥物依家全部都唔見晒咁！
跟住又扯番到近期嘅示威衝突，佢話依家做緊嘢嘅好似只係得番飯都冇得食、覺都無得瞓，仲要無吉祥物嘅警隊，反問依家呢班吉祥物，係咪全部都同緊大嘥鬼嘅主人去晒行山？
宣傳未按時局 政府平行時空
佢仲大鬧政府負責做宣傳嘅部門唔單止冇好好利用呢啲吉祥物，依家做緊嘅宣傳仲好似活喺平行時空咁，批評好多依家賣緊嘅政府廣告完全冇因應時局去提供資訊。睇嚟政府真係要喺「關公問題」上畀多幾錢力水。