政情：公民講場：棕地檢控率奇低 規劃署縱容違例

政府話冇地起樓，外界強烈要求先發展棕地建屋，但政府又話難，反而硬推明日大嶼填海計劃，倒錢落海。話說發展局書面立法會財委會特別會議時就話，喺一四年至一八年間，政府因應一千二百八十宗與棕地有關嘅違例發展個案採取執管行動，惟只有一百七十五宗提出檢控，仲解釋話其餘嗰千幾宗，有八成遵守通知書改善咗，只係得約一百八十宗仍在調查。老實講，檢控率咁低，難免令人質疑規劃署署長李啟榮係咪翹埋雙手唔做嘢？又或者係執法太寬鬆呢？睇嚟李啟榮都要解畫嘞！