政情：開工偷睇利物浦 立會狗仔隊離晒譜
尋日上演嘅歐聯四強次回合賽事，利物浦奇迹反勝巴塞隆拿四球，兩回合計以四比三出線，連續兩年進身決賽。呢場比賽就連非足球迷都略有所聞，好似立法會就有人公然重溫賽事，你話場波有幾吸引呢。
睇得招搖 表情冷靜
立法會尋日審議《2019年撥款條例草案》，關乎到整份財政預算案，立法會大樓內當然要駐滿「狗仔隊」，防止有任何甩漏喇。不過，坐喺會議廳正門外對出嘅一名「狗仔隊」人員似乎唔夠認真工作喇，拎住平板電腦重溫尋日呢場大逆轉賽事，仲非常張揚以全螢幕觀看，盲嘅都睇到佢偷懶喇！
雖然呢名「狗仔隊」人員睇得招搖，但過程就相當冷靜，好似見到利物浦入球時刻都毫無表情，唔知係咪抑壓緊內心嘅興奮呢？萬一佢遲吓畀人照肺，希望佢都可以保持冷靜嘞！