政情：岑智明訪山竹災區 網民質疑高官無影
超強颱風「山竹」襲港，威力之大同殺傷力有幾大，當時梗係感受到，但隔咗咁耐，大家可能記憶淡咗好多嘞！
唔知係特登抑或咁啱得咁蹺，天文台台長岑智明喺山竹襲港剛過半年，去咗大浪灣遠足。佢喺社交網站Facebook上載咗相同短片，可以睇到鹹田灣塌樹處處，附近亦滿布垃圾同爛咗嘅家具。
推義工計劃助東平洲復原
岑台長貼文話當日探訪咗鹹田灣安記士多嘅溫水生，了解到「山竹」對鹹田灣嘅嚴重破壞，到依家仍然未完全復原，而引述溫生話喺大浪灣嘅破壞，山竹比溫黛更厲害，所以隔籬人稱「香港的馬爾代夫」嘅大浪西灣嘅破壞都係非常嚴重，仲話睇嚟呢個世界級後花園仲需要多啲有心人仕幫手先至可以回復昔日嘅美景嘞！佢仲話天文台嘅義工計劃先去東平洲幫手執垃圾。
呢個post出咗之後，引起唔少網友嘅關注，佢哋話早兩個月前去鹹田灣依然滿目瘡痍，而喺浪茄仍有唔少倒塌嘅樹木有待清理，仲有網友質疑話：「台長都尚且去探望鹹田灣居民，我哋港府嘅更高層官員去晒邊呢？」咦！班高官聽唔聽到呀？