政情：派4000倒瀉籮蟹 陳家豪：手續應化繁為簡
政府早前計劃向合資格巿民派發四千元，但繁複嘅申請手續同高昂嘅行政費用，惹起市民不滿。雲端與流動運算人士協會會長陳家豪就認為，政府只要識得整合巿民嘅資料，申請手續不但可以化繁為簡，更隨時慳番億億聲嘅行政費。
倡政府各部門整合資料
陳家豪話好多個政府部門，例如稅局、運輸處、入境處等，都分別掌握全港巿民某方面嘅資料。政府只要將各個部門嘅巿民資料整合然後建立數據庫，繼而按身份證號碼來設立巿民同政府接觸嘅戶口，往後無論申請或審核都便於自動化處理。當政府唔需要張羅人手去應付額外嘅項目，無形中就會節省唔少支出，騰出更多資源投放喺其他用途。
至於長者可能會忘記戶口密碼，佢就話透過生物辨識科技，如面容或指紋就可將問題迎刃而解。老實講，政府部門做嘢各自為政，先至係整合巿民資料嘅最大障礙。