中環出更：火頭處處 陳帆簽名被嘲似陳瓜
近年港鐵風波一浪接一浪，前日仲發生撞車事故，至今都仲未恢復服務。運輸及房屋局局長陳帆尋日同港鐵召開咗緊急董事局會議商討事件，去完之後出席一個公開活動時，簽名嗰刻仲將自己個「帆」字，簽到成個「瓜」字咁，唔通有弦外之音？
陳回應港鐵試車 遭劉慧卿噓
話說陳帆出席活動時唔止簽名留字，仲畀民主黨（白鴿黨）前主席劉慧卿（卿姐）捉住問佢港鐵方面搞成點，同埋問佢有冇相關嘅好消息？陳帆回應時就話唔畀港鐵試車，直到行車安全為止喎。卿姐同埋該黨現任主席、立法會議員胡志偉聽到仲即刻噓佢添！
唔止噓陳帆，胡志偉仲留意到陳帆個簽名，仲笑佢個簽名，話「唔怪得你簽名簽到成個瓜字咁啦」。不過，陳帆就解釋，話其實係簽名簽到尾時，見到其他白鴿黨嘅黨員個名，所以先嚇到縮手喎。講就咁講啦，唔知大家信唔信呢？