中環出更：食河豚享受脷痹 林青開心到跳舞
最近好多人出埠度歲，無論係去冰封嘅世界或熱辣辣嘅國度，最緊要同至愛嘅親人玩得盡興。香港福建三明聯會青委會副主任林青（Erica）同家人就去咗日本玩，日日浸溫泉、食靚嘢，不知幾開心。Erica話，今次最正係食河豚肉，佢哋幫襯一間專食河豚嘅餐館，廚師刀工一流，食咗之後條脷同口腔有些少痹嘅感覺，係食河豚最頂級嘅享受，難怪佢返到酒店浸溫泉時，開心到跳舞。
Erica話，以前試過生食河豚，今次係第一次用火鍋熟食，味道更加清甜彈牙。由於河豚有毒，更加考廚師嘅刀工，今次搵到咁專業嘅師傅，覺得好幸運。Erica同媽媽及老公唐卓敏醫生已連續多年去日本過農曆新年，今次行程長達九日，日日食足三餐，但係體重竟然冇增加，佢笑稱可能同一日浸兩次溫泉有關，皮膚仲靚咗添！
周詠琁首嘗摸海豚
唔想喺冰天雪地裏尋樂，中東杜拜係一個熱門選擇，靚女歌唱家周詠琁早前就忙裏偷閒同家人一齊去。佢仲着晒潛水衣同海豚玩遊戲，笑稱係咁大個女第一次觸摸海豚，好難忘。玩咗幾日返到香港，冇耐佢又飛去澳洲墨爾本參加元宵晚會表演，真係忙到冇時停。
做珠寶生意嘅「中東王子」沈運龍就去咗印度參加朋友婚禮，期間着上印度傳統服飾，成個中東王子咁款。佢話婚禮場面勁墟冚，事關多達五百幾名賓客同大笨象、馬匹及駱駝齊齊跟隨敲鑼打鼓嘅隊伍喺街巡遊，浩浩蕩蕩，仲要出動幾十架電單車開路，沈太Alice第一次參加咁盛大嘅印度婚禮，直言大開眼界。
卓妮