中環出更：練心肺復甦法 梁君彥慢幾拍
尋日一班立法會議員齊齊「上堂」學習心肺復甦法及心臟除顫器使用知識。主席梁君彥講笑，話立法會工作屬於高危，有必要學多啲急救知識，必要時可以救人一命。不過當導師教做心肺復甦法時，梁就跟唔上口訣，動作慢咗幾拍，雙手都無依指示就直接跳去直手按壓嘅步驟。好彩係對住個公仔做啫，唔係就大件事喇！
做民安隊學過 柯創盛當重溫
劉國勳、麥美娟、柯創盛及馬逢國等議員都有去「上堂」，劉國勳初時未能掌握按壓速度，以為密密按壓就可配合一秒撳兩下嘅速度，後來有人提醒佢先知撳得太快。柯創盛以前參加過民安隊，學過心肺復甦法，今次算係溫故知新。佢笑稱議員持唔同政見，一旦發生衝突激到心臟病發，急救技巧就好有用喎。
麥美娟就諗起多年前有親友做運動時心臟病發，佢收到消息趕去醫院，亦未能見最後一面，所以佢認為公眾場所要添置多啲心臟除顫器，亦應向大眾推廣心肺復甦法。
卓妮