黎耀昌奶爸甘苦談
作為父母，陪伴子女成長帶來無數歡樂，然而撫養過程卻會筋疲力竭。效力港超理文的黎耀昌與愛妻Yuki的愛情結晶品「星辰」去年9月出世，雖然兩位新手父母初時也有束手無策的時候，但適應過後，跟愛子相處的每一刻，已成為他們樂不可支的時光。
回想起愛兒「星辰」誕生後最初3個月，黎耀昌坦言是最「艱難」的時期，幸得到理文教練陳曉明體諒︰「我覺得初為人父頭兩、三個月係最辛苦，BB每隔兩個鐘頭就飲一次奶，譬如凌晨4點餵完，6、7點要再起身餵，對我練波都有影響。嗰陣練波好冇精神，『陳Sir』都好體諒我，練習時會驚我拉親而就住我，不過阿仔戒咗夜奶之後就好啲喇。」
大部分球員於三十多歲左右掛靴，然後向教練方向發展，「扭扭昌」亦不例外，問到兒子會否繼承衣缽，他則處之泰然︰「除咗踢波，都希望將咁多年喺球圈嘅心得同經驗傳畀下一代。我同老婆有共識，就係等『星辰』自由發展，佢鍾意踢波就踢，唔鍾意踢就唔逼佢，我哋唔係『怪獸家長』，最緊要佢唔好學壞就得。依家我好享受教小朋友，之前教過班5至7歲嘅小朋友，見到佢哋好投入同鍾意足球，自己本來唔太精神或者唔太開心，都突然會受佢哋感染埋一份，會開心番。」
三十而立改踢法
而立之年，正是男人的黃金時期，但在體壇，30歲已是運動員的「暮年」，「扭扭昌」也因要配合球隊，一改喜歡扭波的習慣︰「我嘅速度同爆發力冇之前咁靈活，加上球隊踢法着重整體，節奏快上快落，所以要避免盤球犯錯，減少咗扭波。不過自己踢咗咁多年翼鋒，有時會回後幫隻閘補位，所以位置感嘅意識係有嘅，只係身體對抗同爭頂要加強番。理文大部分成員係年輕人，我會做好本分，間中提點隊友，同佢哋打成一片，大家相處開心，感覺自己都後生啲。」
「老竇集中營」齊傾湊仔經
榮升爸爸後，外號「扭扭昌」的黎耀昌場外場內都比以前成熟不少，也慢慢調整了心態去應付比賽和家庭生活，還多了與隊友分享湊仔樂︰「自己會比之前積極啲，同埋比賽心態都強咗。依家同我差唔多年紀，或者結咗婚準備生BB嘅球員，例如嚟緊有『達Sir』（曾昭達）同黃俊皓都就嚟做爸爸，或者見到『偉豪』（陳偉豪），大家傾偈都會圍繞結婚、生仔嘅話題。『09』（梁興傑）2月26日就結婚，佢都好鍾意小朋友，我都想像到佢會好快做爸爸。」
黎耀昌Profile
出生日期：1988年9月25日
身高：1米74
體重：67公斤
位置：右翼、右後衞
曾效力球隊：
西貢、流浪、四海、天水圍飛馬、屯門、晨曦、黃大仙、南華、理文流浪、陽光元朗
現效力球隊：理文
球衣號碼：12
圖/文：何彥霆