「我只想，身體健康，我害怕你要照顧我擔心得出一臉倦容，而我病床中反悔內疚……」功夫茶之所以突然間諗起呢首歌，皆因近排流感疫情勢兇夾狼，四日內奪去近三十條性命。你知喇，家陣公立醫院十個煲得七個蓋，差唔多間間都超負荷，一個大吉利是躀低入廠，真係唔慌唔「反悔內疚」咯！
今年流感疫情認真反常，夏季高峰期仲未見頂，病情嚴重個案已經係冬季高峰期嘅三倍有多，衞生署最近公布數據，過去兩個多月錄得嘅一百七十多宗嚴重流感個案中，死亡比例近七成，都咪話唔誇張。喺咁嘅情況下，原本已經逼爆嘅急症室自然逼多幾錢重，好似屯門醫院急症室咁，非緊急病人最少要輪候七粒鐘，兒科病房使用率曾高達百分之三百，前線醫生更形容「間間醫院內科病房都崩潰」。
冇錯喇，人手不足已經係本港公營醫療系統嘅死症，呢嗱，話口未完，瑪嘉烈醫院又爆出開錯病人腦醜聞，同類事故一而再、再而三，固然同個別人員疏忽大意有關，但前線醫護做到有氣冇碇抖，以致忙中有錯，亦係不爭嘅事實。咪話功夫茶唔警告，公共醫療系統本來已經捉襟見肘，一場流感殺到，更加係雪上加霜，萬一有其他重大疫情多面夾擊，後果肯定不堪設想。
不過奇怪嘅係，部分前線醫護一方面呻唔夠人呻到樹葉落，另一方面又抵死抗拒輸入外援，面對「專業霸權」，港府一籌莫展，淨係拆東牆補西牆，再唔係就搞「用者自付」，大幅提升急症室收費水平，問題係無論收費幾高，有需要嘅病人都要硬住頭皮幫襯，家陣急症室依然逼爆，證明呢條爛橋根本唔Work。
講番呢波流感疫情，衞生防護中心分析後發現，三成二嚴重成人個案曾接種疫苗；死亡個案中更有四成人曾打流感針。有專家指出，現時嘅疫苗配方只有四成效力，外國唔少地區都會向長者等高危人士處方特敏福作為雙重保護，點解香港唔借鏡人哋嘅經驗？擺明就係當局做漏招。當然喇，大家早就見怪不怪，當局之前都試過流感疫苗入錯貨，萬一市民以為接種後有免疫力而掉以輕心，中咗招都唔知入邊個數。
正所謂牽一髮動全身，近排多咗長者因為流感入住公立醫院，當中部分病情輕微，其實一早可以出院，奈何家中無人照顧，又或者搵唔到院舍而被迫「滯留」醫院，分分鐘交叉感染，小病變大病！
一葉落而知天下秋，一場流感疫情，將本港公營醫療系統資源配置、疫情防治以至安老政策等諸般頑疾暴露無遺，睇嚟最應該入廠大修嘅都係嗰班廢柴高官！