舊陣時父母鼓勵子女讀書，例牌會講「書中自有黃金屋」，再唔係就「萬般皆下品，唯有讀書高」，不過今時今日呢啲金句已經OUT嘞，讀書未必會發達，但賣書肯定係財路，書中自有黃金屋其實係講緊書商咋。
呢嗱，升中派位早前公布結果，呢兩日唔少家長帶同子女去獲派中學註冊兼領取書單，一睇價錢難免牙痛咁聲，事關今年書價整體上升百分之三至四，跑贏通脹，買齊一套教科書動輒三、四千元，如果咁啱有兩名子女一齊開學，連埋校服雜費，冇一皮嘢都唔使旨意埋單，都仲未計補習費同課外活動開支呀，連中產家庭都大叫吃不消，基層家庭嘅壓力有幾沉重，唔使問都知。
講真，教科書年年加價早就唔係新聞，有書局東主話今年加幅算係預料之內，咁就睇你點比啦，教育局實施五年唔改版措施，今年並非改版年，唔可以加得太盡，但部分書商依然少理，好似某套初中英文教科書咁，今年比去年加價近百分之五，一套賣逾千元，有小學音樂書仲加價近百分之六添。最好笑係書商每次加價都賴薪酬、物流、紙價、印刷費上升，但消委會早就踢爆近年紙價下跌，印刷費又冇乜變動，至於打工仔加薪有幾多心照啦，擺明係欲加之價，何患無辭啫。
即係咁，港府都唔係唔知書商食水有幾深，家長擔子有幾重嘅，近年搞咗唔少花臣，話要同書商玩鋪勁喎，一時分拆教材，一時電子教學，一時自行招標出版教科書，弊在唔係雷大雨小，就係爛尾收場，甚至一度被寄以減價厚望嘅電子教科書都係咁加，港產官僚廢成咁，(火羅)成咁，簡直冇眼睇。所以話，書商睇準當局色厲內荏，無所作為，點會唔有恃無恐，予取予求吖。
真係諗極唔明，港府花大力氣搞十五年免費教育，無非都係想減輕家長負擔，造福下一代，偏偏對書商飛擒大咬束手無策，學費係就係免咗，之但係書簿費條數仲乸脷，豉油仲貴過隻雞，都好諷刺啫。再講吖，港府乜都鍾意參考外國先例，前教育局局長吳得掂仲環遊全世界取經添，咁點解唔學吓外國，由政府自行設計及出版教科書呢？當局一味以自由市場做擋箭牌，實情係怕咗利益集團至真，咁樣同助紂為虐又有乜分別喎。
嗱，新政府一上場就大手筆新增五十億元教育撥款，係威係勢咁款，之不過淨係撥款唔夠o架，教科書加價呢座大山一日唔移走，家長只能任人魚肉，新任教育局局長楊潤雄夠唔夠膽真正玩鋪勁，大家(目及)實喇。