「開開心心上班去，平平安安回家來」係打工仔最卑微嘅願望，可惜現實生活中好多工作場所危機四伏，返工同搵命博冇乜分別。呢嗱，話口未完，紅磡地盤又發生奪命工業意外，三名工人被活活淹死，三個家庭破碎，其中一位更只有廿歲出頭，真係聞者傷心！
地下工程水浸事故雖然話相當罕見，但其實完全有可能發生。好似事故現場呢啲嘅舊區咁，地下密布水管、電線同煤氣等管道錯綜複雜，特別係水管大多殘殘舊舊，三日唔埋兩日爆到瀑布咁，照計施工單位事前應該進行相關安全評估，做好萬全之策。正如有工會人士指出，做呢類地下工程時，應該同時設置大泵力抽水機，以便喺緊急情況下抽走沙井內積水，盡快展開救援，但今次意外莫講話冇抽水機，工人連最基本嘅安全帶、安全繩索都欠奉，以致出事時叫天不應，叫地不靈，到底中間出咗咩問題？仲有就係類似嘅舊區工地環境，全香港仲有好多，如何確保悲劇唔會重演？
每次爆親大鑊，高官例牌菜重申深表遺憾，加強巡查，有責必究等幾句官腔，但大家要追問嘅係，點解工程安全措施甩甩漏漏，照樣可以去馬？唔使問阿貴，梗係當局平時疏於監管，承辦商即使一味貪快，唔跟足安全指引亦絕少斷正上身，僥倖心態之下，搞出人命只係遲早嘅事。所以要問責咯喎，梗係先問有關部門監管不力嘅責任喇！
港產官僚最鍾意噏呢句口頭禪︰「意外一宗都嫌多」，實情係意外一而再、再而三，其中建造業更加係「攞命重災區」，傷亡個案由○九年嘅二千八百幾宗，增至一五年嘅三千八百幾宗，短短六年間升幅接近四成，都咪話唔得人驚！
講開建造業工業意外，不得不提有「奈何橋」之稱嘅港珠澳大橋香港段工程，咁多年來一共死咗十個人，淨係早前一宗塌工作台意外，就有兩人魂斷大海。除咗勞工處同路政署等巡查不力，法庭屢屢放生工程安全肇事者，甚至有時「幾萬蚊一條人命」，姑息養奸成咁，有乜法子唔死得人多。
汝不殺伯仁，伯仁因汝而死。負責監管同宣傳工業安全嘅衙門多不勝數，勞工處、機電工程署、職業安全健康局……依家奪命意外長爆長有，講到尾都係三個和尚冇水喝，多人管即冇人管嘅官場痼疾，形容呢啲衙門係殺人幫兇，絕不為過。
查實計功夫茶話齋，想保工人平安，好簡單嘅啫，學似內地礦井咁，領導身先士卒，實行「帶班下井」，針拮到肉自然知痛，官老爺仲點會唔嗲唔吊，事不關己吖！