香港教育制度畸形，已經去到病態嘅地步，否則又點會贏喺起跑線前都唔夠，仲要贏在射精前吖。咁都未算喎，家長為咗催谷子女無所不用其極，花費之巨冠絕全球，呢勻直情贏在世界前喇。
冇誇張o架，有銀行喺全球十五個國家及地區進行調查，結果發現由小學至大學階段，香港家長用於子女教育嘅總開支超過十三萬美元，折合港紙過百萬元，比排第二嘅阿聯酋多逾二十萬港元，更多過排第三嘅新加坡近倍，至於英美呢啲港人留學勝地直情不入流，只能望香港嘅項背咋。
大嗱嗱「一球」認真唔嘢小，到底啲錢用喺邊呢？原來除咗交學費、買書簿，好大筆用於子女補習。嗱，多達八成八家長曾經或現正為子女支付私人補習費；五成家長為支付子女嘅教育開支而節衣縮食，犧牲其他開支亦在所不計，呢啲咪叫可憐天下父母心囉。
冇計啦，香港社會競爭激烈，教育貴族化，孩子冇十八般武藝傍身，想入名校幾乎唔使旨意，家長望子成龍心切，紛紛變身虎爸虎媽，其實都係為勢所逼嘅咋。唔係咩，大學沙紙愈來愈唔馨香，無論係走出校門首份人工定係入息中位數，二十年來不升反跌，大學生已經咁唔值錢，萬一子女連大學門檻都擠唔上，將來搵食只會更艱難，父母唔操心就假。
最慘係本港教育制度朝令夕改，一時母語教學，一時語言微調，五時花六時變，學生慘成白老鼠，家長亦無所適從，淨係TSA已經搞到天怒人怨，家陣改頭換面變成BCA，咪又係換湯不換藥。難為吳得掂局長仲大義凜然話取消好容易，但就對唔住學生同家長喎。講到咁偉大，咁點解釋包括吳局長在內嘅高官權貴子女爭相去海外留學，都唔留低接受咁優質嘅香港教育呢？
講番轉頭吖，養兒一百歲，長憂九十九，父母着緊子女學業完全可以理解，之但係過度催谷，揠苗助長，隨時愛佢變成害佢。好似前幾日先有一單青年疑不堪海外升學壓力而自尋短見嘅新聞，睇到個心都實晒。所以話，家長與其一味將主觀願望投放喺子女身上，令子女失去自由發展嘅機會，不如畀子女一個快樂童年仲好喇。
講到尾，都係港府無能惹嘅禍。如果港府真係可以將產業做大做闊，處處有機會，年輕人又使乜擔心冇出路喎？如果教育制度真係求學不是求分數，又點會連幼稚園學生都話要補習喎？新政府上任後將增撥五十億元作為教育經常開支，係就係夠晒大手筆嘞，最怕又係用於評估呢樣、考核嗰樣，咁就盞嘥氣嘅咋。