有咁耐風流，有咁耐折墮。壹傳媒反中亂港咁多年，現眼報終於出現，全年業績見紅唔在講，仲要係七孔流血不止嗰隻，家陣諗到冇嘢好諗，竟然搞自己員工，無良成咁，係漢奸黎先至做得出咯。
壹淫媒早前公布全年業績，勁蝕近四億元，報紙愈出愈薄，雜誌紛紛收檔，就連過去最賺錢嘅數碼業務都錄得虧損，加埋台灣分部一樣蝕到趴街，漢奸黎陷入窮途末路，想唔講句「金翅大鑊鳥」都唔得。既然有名你叫漢奸黎，出賣國家都係小菜一碟啫，為咗止血填氹，出賣員工更加係諗都唔使諗喇。
嗱，壹淫媒早前發出內部通告，話要鼓勵各部組員工創業，要求佢哋自動離職成立工作室，再將新聞論件計酬，爛果報會以員工七至八折嘅薪金買新聞喎。喂，咁咪即係將新聞外判，變相減薪裁員同自僱？講到鼓勵員工創業咁偉大，其實想連遣散費都慳番就真，呢條屎橋怕且只有漢奸黎先至諗得出，勞工處應該跟進嘞。難為一班員工為漢奸黎出賣青春咁多年，捱生捱死打天下，冇功都有勞，家陣唔該都冇聲就想將佢哋掃地出門，有冇再卑鄙啲吖。
咁當然啦，邊度有壓迫，邊度有反抗，工會呼籲各部組員工唔好接受呢個咁PK嘅方案，今日會同管理層講數。有員工私底下話與其變相自僱，不如執咗爛果報喎，差在未公開爆粗問候漢奸黎咋。講到呢度，功夫茶不禁諗起漢奸黎早前惡形惡相用粗口辱罵兼涉嫌恐嚇本報記者，乜嘢「我實搵人搞×你」、乜嘢「×你老母×」，估唔到咁快反彈番去自己身上，都算抵死咯。唔係咩，佢搞唔到本報記者，反而先搞自己員工；佢問候本報記者娘親咩，結果畀自己員工問候番轉頭，呢啲咪叫多行不義必自斃囉。
話時話，漢奸黎搞嗰瓣死嗰瓣都唔係第一次，好似台灣壹電視咁，愈做愈縮，卒之冇鞋挽屐走，執笠收場；又好似《爽報》吖，當初係威係勢，點知話口未完極速爽死；至於再遠啲嘅爛果速銷冚旗收檔都費事講嘞。最好笑係漢奸黎一直以民主鬥士自居，乜嘢新聞自由、人權大義，吹到天花龍鳳，結果一出事就即刻踢人落船，毫無道義可言，信佢嗰啲傻仔傻妹咪自己捉蟲囉。
都係嗰句嘞，出得嚟行，預咗要還。漢奸黎平時做埋咁多陰騭嘢，家陣終於到咗折墮嘅時候，畀員工鬧到媽媽聲只係開始咋，佔中呢筆帳仲有排同佢算呀。大漢奸秦檜下跪千年任人唾罵，另一個大漢奸汪精衞死後被炸到銼骨揚灰，至於漢奸黎有乜下場，大家不妨放長雙眼喇。