如果話貓有九條命，咁走狗又有幾條命？走狗們食君之餅，擔君之憂，主人叫咬邊個就咬邊個，做埋咁多唔見得光嘅嘢，出親街人人喊打喊殺，就連大文豪魯迅都呼籲痛打落水狗，可見走狗確實係「高風險行業」，少幾條命都唔掂。
呢嗱，記協就係典型例子嘞。係人都知佢哋由壹淫媒老闆漢奸黎同埋背後嘅外部勢力包養，向有「淫媒外圍組織」、「漢奸俱樂部」之稱，為博主人歡心，久唔久都會趷個狗頭出嚟亂吠亂咬，好似尋日發表嘅所謂言論自由年報咁，當中點名批評《東方日報》舊年報道內地女律師王宇嘅做法，對報道內容有否新訊息、篇幅長短等指手畫腳，說三道四，果然係狗口長不出象牙。
有學者就講得啱嘞，只要東方根據事實報道，有自己觀點同睇法都冇任何問題，至於派幾多人手，出幾大篇幅甚至出唔出，呢啲係媒體編採自由，點都輪唔到記協差隻腳埋嚟管。如果以後報館做嘢都要請示佢哋先，咁唔好叫「香港記者協會」，改名「審查記者協會」又或者「干預採訪協會」罷喇！
可能記協以為自己真係「無冕皇帝」，個個都要聽佢哋廢噏，佢哋呢頭批完東方報道，嗰頭又話近年有超過八成半主流媒體老闆或新聞部主管，獲港府授勳或委任為北京建制成員，質疑北京染指香港傳媒云云。其他媒體唔講，東方一向是其是非其非，有嗰句講嗰句，天王老子都冇面畀，對於英國佬留落嚟嘅荷蘭水蓋一類虛銜，更視之如浮雲。怕且喺記協眼中，愛國愛港係原罪，只有壹淫媒咁專舔洋老闆鞋底至叫「新聞自主」，呢啲咪狗似主人形囉。
話時話，人哋英國、美國記者組織以捍衞業界權益為己任，絕大多數時間指向國內外政府不當行為，唯獨香港記協不務正業，對行家橫加批判，早就淪為洋奴漢奸嘅私家打手。前特首梁振英向傳媒發律師信，記協狠批「令傳媒有好大心理威脅」；漢奸黎粗口問候記者娘親不特止，仲聲稱「實會搵人搞你」，絕對唔止「心理威脅」咁簡單，記協點解粒聲唔出？仲有吖，漢奸黎對旗下員工「假自僱，真裁員」，搞衰整個傳媒行業生態，破壞新聞報道質素，記協除咗發個不痛不癢嘅所謂聲明，幾時有認真幫過行家？鬼咩，記協領導層轉嚟轉去嗰班人，十之八九打過漢奸黎工，你幾時見過狗會咬餵嘢畀佢食嘅手o架！
記協假新聞自由之名行看家護院之實，正式係人模狗樣，神憎鬼厭，市民早就想叫佢哋盡早摺埋，咪出嚟蒲那麼──多，有啲高官唔知點解硬係對佢哋情有獨鍾，年年籌款晚宴年年捧場，都唔知博乜。漢賊不兩立，新一屆政府係時候同漢奸俱樂部劃清界線嘞！