的士救亡推運動 禮貌待客是本分

如果話的士係一個城市嘅名片,咁的士司機就係旅遊形象大使。可惜吖,近年的士司機嘅服務態度備受詬病,揀客拒載之餘,仲有黑的劏客,呢張名片褪色事小,香港好客之都嘅形象所餘無幾事大。

冇錯嘞,一粒老鼠屎足以搞壞一鍋粥,何況近年涉及的士業界嘅投訴居高不下。睇吓新聞咪知囉,不時有黑的劏到旅客一頸血,有啲畸士誇張到由機場去紅磡叫價八千大元,好過去搶;有啲畸士衰到呢頭畀警方放蛇捉完,嗰頭又重犯,簡直沒有最狼死,只有更狼死。至於短途客唔載,過海客唔載,兜路濫收車資等等,更係不在話下。呢,前排有的士司機偷拍餵哺母乳嘅媽媽再將影片擲上網,直情連少少道德都冇,唔少市民同旅客谷到一肚氣,紛紛轉投網上叫車服務就係咁解,如果唔係,當局嚴打的士競爭對手Uber就唔會引起咁多市民同情喇。

嗱,可能的士團體都知道群情洶湧喇,尋日特別推出為期一年嘅「的士禮貌運動」救亡,目前已經有數百部的士響應,除咗會喺的士車廂張貼告示,提醒司機以禮待客,仲會早晚派「禮貌大使」喺繁忙站頭協助乘客及接收投訴添。如果證實司機行為有問題,會安排司機上堂改善服務態度,屢勸不改者更會拒絕向其租車,都咪話冇誠意呀。

都係嗰句,樹大有枯枝,全港的士司機數以萬計,劏客、拒載嘅不法分子始終係一小撮嘅啫,難得的士業界從善如流,改善服務質素,功夫茶梗係舉腳贊成啦。不過講到底,的士業界之所以亂象叢生,最大原因同市場上欠缺競爭有關。自從港府停發的士牌後,的士牌價炒到水漲船高,肥咗車主之餘,租車司機其實冇乜肉食,開工難免黑口黑面,久而久之咯喎,形象咪愈做愈差囉。

咁當然啦,的士係公共交通工具,司機係服務性行業,保持基本禮貌係應分,乘客上得車就要安全送佢哋到目的地,其餘講乜都假。再講吖,近年香港旅遊之都嘅形象一落千丈,驅蝗趕客、黑店劏客等亂象固然係罪魁禍首,但的士身為「城市名片」,又有冇做好本分呢?旅客人生路不熟,搭的士係指定動作,碰着個有禮守規嘅司機大佬,對香港嘅印象分亦會大大增加,所以幾時都話,的士司機對香港形象真係好重要o架。

話時話,港府計劃引入六百部優質的士,唔少的士司機即刻跳出嚟反對,但正如學者話齋,有益乘客嘅事就應該做,起碼家陣有的士團體的起心肝推出救亡運動,證明有競爭先至有進步吖嘛。