既然「豬肉佬」可能改名「分割技術員」，咁嫩模叫「宅男福利發放者」自然實至名歸啦。擁有驕人上圍嘅嫩模陳思琪，不但輕易成為男士嘅焦點，配合埋佢條蛇腰更係令宅男着迷。不過，佢除咗「樣靚身材正」呢五個字，仲有不為人知嘅過人之處。
山東濟南出生，其後跟隨父母移居廣州嘅中俄混血嫩模陳思琪，擁有「宅男福利發放者」嘅外號。事關佢經常喺網上發布激凸兼露出事業線嘅寫真之餘，更喺個人微博中大晒出眾身材，令廣大網民雀躍不已兼流晒口水，最重要係每次預告新相推出前，都會令人期待，福利發放者之名實在當之無愧。佢除咗喺網絡上人氣爆燈外，亦喺模特兒界具有相當名氣，事關早喺2013年8月，參加華誼新面孔影視模特大賽，成功進身哈爾濱賽區前20強後，又喺同年11月於武漢舉辦嘅總決賽中，獲得T台組女模冠軍。不過呢個時候嘅佢仍未算成名，皆因隨後喺12月參加第十九屆中國模特之星大賽，憑住淡定表現及出眾外形，獲得十佳女模特榮譽，從此正式開展模特兒生涯。
家陣嘅佢不但現身於平面廣告、產品代言、商業活動，更經常喺電視及電影中亮相，又以車模身份喺車展中散發艷光。不過正當大家嘅焦點集中喺佢混血美人嘅外形、前凸後趷嘅身材及一幅幅火辣寫真相之際，有一點長期被大家所忽視，就係佢更係一位音樂天才，並曾於濟南市小學生音樂兒童節中獲得一等獎。此外，喺2010年於我是校園歌手大獎賽中獲得二等獎，其後又喺2011年由南方電視台舉辦嘅歌唱比賽愛拼才會贏中，獲得總冠軍殊榮。種種嘅成就足以說明佢不但係個外形標致同身材火辣嘅模特兒，音樂及歌唱才華同樣相當出色，只係唔知要到幾時，先至可以喺樂壇見到佢迷人嘅身影呢？
擁有福利發放者美譽嘅陳思琪，唔單止養眼寫真令人着迷，更經常喺個人微博展露誘人身段。當然，佢亦會喺微博上分享私人生活，等粉絲可以深入認識到佢。希望未來有機會嘅話，可以分享埋美妙嘅歌聲就更加好啦！
網址：www.weibo.com/u/1987977925
出生地：山東濟南
身高：171cm
三圍：39、24、38
撰文：魂
相片來源：互聯網