一機在手，天下我有。今時今日，手機已經成為現代人生活不可或缺嘅一部分，不過咁，有一利必有一弊，手機為生活帶嚟便利嘅同時，亦分分鐘成為危害健康嘅都市炸彈，絕對唔係危言聳聽o架！
嗱，有數得計o架，香港流動通訊用戶高達一千七百萬個，平均每人擁有超過兩部手機，都咪話唔驚人。手機多咯喎，俗稱發射站嘅基站自然唔會少。目前全港有逾三萬四千個無線電基站，村屋、公屋、鬧市大廈天台遍地開花，話就話君子不立危牆之下啫，但基站避無可避，梗有一個喺左近。由於基站會釋放可致癌嘅電磁波輻射，市民長期暴露喺癌症威脅下都唔知，真係諗起都牙煙。
更加得人驚嘅係，香港嘅手機基站唔止密度高，而且仲「毒性」強添。本報記者同專家調查全港多個地區嘅輻射安全後，發現除咗鬧市電磁波輻射嚴重，部分新界村屋亦係輻射「重災區」，其中錦田一個村屋嘅電磁波功率水平，足足比德國安全標準高出八十三倍，旺角西洋菜南街更加係超標一百四十一倍，問你怕未！
冇錯，電磁波輻射對人類嘅確切影響，學界至今仍有爭論，但對健康有害無益就梗o架嘞，如果唔係，世衞就唔使喺○五年承認有電磁波過敏症存在，並且喺一一年將輻射列入可能致癌類別喇。再講吖，唔少住近基站嘅市民投訴精神大受困擾，有人聲稱村屋天台基站輻射好勁，逗留一陣已覺得頭痛；亦有人懷疑因此患癌添。人命關天，點小心都唔過分，當局再唔做嘢，香港隨時變輻射港都有之。
可惜吖，港產官僚渾渾噩噩，反應遲鈍，對輻射危害至今闊佬懶理。講出嚟嚇親大家，本港仍然沿用十六年前嘅電磁波輻射標準，莫講話遠低於德國，就算比起內地亦寬鬆十倍。喂，家陣手機已經進入4G時代，你試吓攞番十六年前嘅黑白Mon「蕉仔」手機出嚟用，人哋以為拍緊懷舊電影都似！
老實講吖，保障市民免受輻射威脅，辦法唔係話冇，除咗檢討基站輻射標準，亦有人建議電訊商共用基站，減低同一區內唔同電訊商重複釋放輻射對市民嘅影響，就睇當局有冇承擔嘅啫。
不過嘥氣啦！港產官僚一本通書睇到老，出名唔識變通，淨係嗰個out到冇朋友嘅空氣污染指數，都拖咗廿幾年至肯改，檢討基站輻射標準，唔知又要拖到幾時。唉，睇到啲高官一個二個都係矇查查、傻更更，好難唔令人懷疑佢哋係咪輻射過咗頭，指望佢哋防輻射咯喎，蚊都瞓蛇都死啦！