荷里活鬼才導演活地阿倫有套名作叫《子彈橫飛百老匯》，如果佢打鐵趁熱拍番套續集《子彈橫飛香港地》，肯定大收旺場，事關香港人一定睇得好有共鳴。
梗係啦，最近香港真係子彈橫飛吖嘛，行行吓街都隨時中彈。早幾日之嘛，何文田一位年逾八旬嘅晨運老翁無端端成為活靶，胸口中咗一槍，登時血流如注，送院搶救總算執番條命。事後警方拘捕咗一名懷疑涉案男子，檢走一批氣槍，仲發現附近路牌布滿密麻麻嘅彈孔，證明上址早就淪為「練靶場」。
嗱，同類驚險一幕已多次發生，行人、動物、小巴以至校園紛紛淪為標靶，而且「火力」強大，絕非一般氣槍可以造成，證明改裝氣槍到咗氾濫成災嘅地步。正如「東方報業民意調查」顯示，對於改槍傷人事件不絕如縷，四成三受訪者認為嚴重威脅社會安全；兩成七直指規管氣槍法例落後；兩成四更指改裝氣槍情況失控。
講開又講，改裝氣槍氾濫成災，唔通無王管嘅咩？理論上係有嘅，法例規定氣槍「火力」不得超過二焦耳，否則等同非法藏械，屬於刑事罪行，最高可判監十四年，可惜事實係當局監管寬鬆，有法等於無法，以致改裝氣槍易過借火，唔止有不法氣槍舖提供改槍，就算想DIY，網上一樣有晒教材。有專業人士估計，今次事件嘅氣槍起碼改至五焦耳以上，甚至達到五十焦耳，證明法例形同虛設。
東方報業集團急民所急，憂民所憂，去年初已經以專題揭露不法改槍實況，事後警方曾採取行動，喺全港多處搜獲大量高性能氣槍及伸縮警棍，證明本報所言非虛。問題係港產官僚唔踢唔郁，而且非常之咁健忘，打擊行動無以為繼，卒之搞到氣槍傷人事件重演。上述民調又指出，三成六受訪者批評當局無加強巡查及放蛇杜絕問題；兩成九直斥漠視傳媒第四權監督，改槍氾濫成災；另外兩成九批評當局對改槍問題視若無睹。
無錯嘞，當局對改裝氣槍隻眼開隻眼閉，又當傳媒監督耳邊風，加上罰則過輕，最多罰款了事，根本無阻嚇力可言，結果咪變相縱容囉，咪助紂為虐囉。最得人驚嘅係，當局唔止對監管氣槍懶懶閒，就算真槍實彈一樣矇查查，震驚全城嘅啟晴邨槍擊案，到底槍從何來，警方到家陣都講不出究竟，市民人身安全仲邊有保障吖！
香港自詡安全城市，犯罪率低，其實係自欺欺人嘅啫。今次槍擊案再次為本港敲響警鐘，當局再唔生性加強規管，香港容乜易同美國睇齊，淪為讓子彈飛嘅戰場吖！