一醜激起千重浪，有「淫賤黎」之稱嘅壹傳媒主席黎智英被踢爆向泛民政團及個人秘密捐款醜聞，兩年多達四千萬元，引起各界一片嘩然，要求徹查事件、剷除金權政治嘅呼聲一浪高過一浪。
呢，廉政公署、警方、立法會及稅務局連日來接獲大量舉報及投訴，亦有市民拉大隊到壹淫媒總部同埋相關議員辦事處抗議，有人甚至要求立法會引用特權法徹查添。又難怪群情洶湧嘅，政淫勾結，禍亂香港，係人都有火喇，如果當局呢次仲唔揸正嚟做，盞進一步激起民憤咋。
正所謂，天下無免費午餐，泛民政客收得淫賤黎嘅秘密捐款，梗係要幫佢講好說話喇，只要睇佢哋過去多次喺議會內為淫媒保駕護航，鳴鑼開道，就知道係乜嘢事。最好笑嘅係，有人做得出居然唔敢認，民主黨嘅涂謹申、公民黨嘅毛孟靜同陳淑莊，一直死撐話冇收過錢喎，其中涂謹申同毛孟靜更加惡人先告狀，話事件涉及政治抹黑添。
咁就奇嘞，淫賤黎實牙實齒承認向泛民秘密捐款，包括三人在內，而佢哋居然唔認帳，究竟信邊個先？唔通正如有人話齋，中間人落咗格？其實，咁大筆捐款全部有單有據，證據確鑿，睇怕吟詩都吟唔甩。
所以話啫，呢單獻金醜聞，唔單止廉署、警方、稅局要跟進，立法會更加要一查到底，順便清理門戶。呢班政客平時扮晒清高，港府官員或者建制派議員一有行差踏錯，佢哋就死咬唔放，而且郁吓就話要引用特權法調查，今次輪到自己出事嘞，睇吓佢哋又點樣處理先。嗱，唔好又畀人批死吖，如果佢哋又係採取雙重標準，對人嚴、對己寬，市民實唔肯放過。
講開又講，市民擔心當局高高舉起，輕輕放下，唔係杞人憂天，事關早有前科嘅喇。係人都知，壹淫媒過去已經一百多次違反《淫褻及不雅物品管制條例》，案底仲厚過電話簿，但次次都獲當局放生，最多只係輕輕罰款了事；至於泛民政客咯喎，咁多年來被揭發涉及利益衝突嘅醜聞已多不勝數，結果全部獲法外開恩，有事變冇事。當局為淫媒保駕，為政客護航，搞到愛國有罪，賣國有獎，唔怪得香港烏煙瘴氣，七國咁亂喇。
市民眼睛係雪亮嘅，有項最新民調顯示，市民對政黨觀感全線下跌，近半受訪者認為政黨只為自己利益。呢項調查仲未反映獻金醜聞，如果計埋呢項因素，政黨形象插水都似。
始終都係呢句，出得來行，遲早要還。淫賤黎同泛民政客狼狽為奸，禍亂香港，呢筆帳遲早要清算，一個都走唔甩！