台灣高雄氣體大爆炸傷亡慘重，令人驚覺原來都市炸彈無處不在。其實，香港亦唔好得幾多，同樣係危機四伏，步步驚心，尤其係升降機事故無日無之，市民搭升降機同玩跳樓機冇咩分別，都咪話唔得人驚！
大家應該仲記得舊年三月北角一幢大廈發生嘅事故，一部升降機升至一樓直墮地下，造成七人受傷。意外發生後，當局例牌賊過興兵，除咗檢討一番，仲推出多項補鑊措施添，包括引入計分制，定期公布升降機承辦商評級，以及要求工程人員註冊等，係威係勢，似模似樣。好嘞，依家過咗一年幾，情況有冇改善呢？
唔講猶自可，一講把幾火。機電署舊年錄得三百三十宗升降機意外，比前年大幅上升一成六，而今年頭半年錄得嘅意外更加接近舊年總數嘅七成。即係話，情況唔止冇改善，反而更加惡化，問你服未！
話時話，升降機事故層出不窮，一啲都唔令人意外。港產官僚平時唔燒香，臨急抱佛腳，次次都要爆大鑊先至煞有介事做補鑊騷，但次次都係風頭一過，一切又打回原形。升降機安全問題係咁，塌樹威脅、消防隱患、食安問題亦係咁，當局有邊次唔係敷衍了事吖？有邊樣嘢做得好好睇睇吖？
講到底，墮升降機意外不絕如縷，都係因為維修制度唔合理，業界實行「價低者得」嘅外判制，將貨就價咯喎，點可能有好嘢吖。正如業界人士話齋，承辦商為咗壓低成本，往往削減人手，以前三個人負責嘅工序，依家一個人搞掂，十個煲得七個蓋，唔出事至奇吖。
正所謂，一分錢，一分貨，升降機維修工程價低者得，技術人員待遇唔慌好得去邊。呢，家陣從事升降機維修工程嘅學徒，只有八、九千蚊月薪，就算做足四年嘅熟手技工，亦只有一萬蚊多啲，搞到冇乜新人願意入行。唔好唔記得，全港有超過五萬七千部升降機，註冊維修承辦商得嗰三十幾間，唔少從業員本身已經做到踢晒腳，所謂維修保養其實多數係走馬看花、敷衍了事咋。再加上長期冇新血補充，人手更加緊張，工作更加求其，市民搭升降機只能自求多福咯。
咪話功夫茶唔提醒，升降機每日總乘客量高達二千八百萬人次，足足比港鐵多五倍，出事嘅機會率大好多。港產官僚繼續懶懶閒閒，萬一搞出人命咯喎，睇你哋又點樣孭鑊！