鹹濕迎新年年玩 德育失落幾時還

古人話,「大學之道,在明明德,在親民,在止於至善。」簡單嚟講,大學生除咗要有知識,仲要有道德,有品味,有善行。今日嘅大學做唔做到呢?唉,畫公仔唔使畫出腸嘞啩!

嗱,大學迎新營年年玩不文,屆屆鬥鹹濕,大學生變淫蟲,你話點樣明德、點樣止於至善吖。唔信嘅話,睇下科技大學工商學院點樣玩不文,迎新「淫」,你就一清二楚啦!

有網民踢爆,科大過百名大學生大玩有味遊戲「毛毛蟲」,男女梅花間竹而坐,後面嘅人要用雙腳蹺實前面嘅同學,女生雙腳放喺男生性器官上面,男生雙腳就觸碰女生嘅胸部同陰部,然後一齊爬行,男女交纏,集體化身「大淫蟲」。更加令人眼冤嘅係,部分學生唔只唔覺得下流,玩到忘形時仲哈哈大笑添。

唉,大學生玩到咁低俗,佢哋笑得出,家長同市民就笑唔出啦。其實,科大搞有味迎新營惹來非議,唔係第一次o架嘞,上年迎新營男生雙腿夾水樽,扮向女生「顏射」,結果引起非議。大學教人明德格物,唔係教人鹹鹹濕濕,淫賤迎新營呢個墮落傳統到底幾時至會消失呀?

大學生係社會棟樑,上大學嘅第一堂課唔係習知識、學德育,而係習淫賤、學低俗,香港以後會變成乜嘢世界呢?大學鬥世界排名就話好啫,家陣年年迎新營鬥淫鬥賤,香港容乜易由「盛事之都」變「淫賤之都」?

開講有話:「養不教,父之過;教不嚴,師之惰。」大學生行為過火,父母固然有責任,大學迎新營年年淪為淫賤派對,校方更加有責任。人哋送仔女嚟學習知識,裝備自己,唔係學習鹹濕,作賤自己。嗱嗱嗱,網友就講得啱嘞,唔相信每個女生都持開放態度,大學校方唔想誤人子弟,唔該快快整頓呢股迎新營淫風!

歸根究柢,大學生品味低俗,道德失落,其實就係教育制度出咗問題。鬼咩,學生喺現有制度之下,個個變晒考試機器,求學只為求分數,乜嘢德智體群美,統統沖晒落廁所,結果咪搞到世風日下,道德敗壞咯。

正如有位讀者話齋,德育及國民教育風波鬧得沸沸揚揚,反對嘅市民只談國教,避談德育,反映香港學生所缺乏嘅正正就係德育,由大學淫賤迎新營現象就睇得一清二楚啦!

一句講晒,鹹濕迎新年年玩,德育失落幾時還,唔該當局同校方快啲諗計,唔好再畀淫賤迎新營呢個墮落傳統繼續傳落去嘞,如果唔係,搞到香港大學生以後連「廉恥」都唔識寫,咁就該煨囉!