老吾老以及人之老，意思係話照顧自己嘅老人家之餘，亦要照顧人哋嘅老人家。講就講得好聽嘞，簡直係百行以孝為先，之但係實際操作起上嚟都相當吃力，養得起都攰到死！
統計處冇耐之前公布人口預測，三十年後香港人口增至八百四十七萬，六十五及以上長者比例由現時一成三大幅增加至三成，大約二百五十萬名銀髮一族。長者人多勢眾自然帶來一連串問題，最明顯係醫療系統負擔沉重，畢竟年紀大機器壞，老人家睇病隨時多過後生仔睇波。
點樣應對人口結構邁向銀髮之路呢？安老事務委員會主席陳章明就話嘞，現時老人政策較為零碎，經常要跨部門提供不同服務，希望政府能夠制訂完整政策。陳章明仲話，香港需要退休保障，但必須小心處理是否全民保障同保障金額，又建議推遲退休年齡。
冇錯，老人政策的確零碎，事關前朝曾蔭權政府目光短淺種下禍根。煲呔曾黐飲黐食你就聽得多，幾時聽過呢一位貪腐特首關愛過公公婆婆？如果有關愛，不孝之徒貪曾就唔會咁縮骨，一度考慮引進生果金入息審查，擁有畢生積蓄棺材本都要取消資格，激到公公婆婆命都短幾年。
對於港男港女平均八十幾九十歲命，唔知好彩定係唔好彩成為全球最長壽地區，「東方報業民意調查」顯示，四成受訪者憂慮社會負擔增加；三成四擔心人口老化加劇；一成九預料政府開支增加。
人口老化加上出生率低，未來三十年將會出現一個情況，每一千名勞動人口要撫養六百四十五人，平均三名打工仔要撫養兩名十五歲以下青少年或者六十五歲以上老人家。對於呢個問題，民意點睇呢？三成七受訪者認為香港將面對勞動人口不足問題；兩成九覺得政府應該推出鼓勵生育政策，用以提高出生率；一成九擔心政府要加稅應付龐大開支。
所以話啫，官僚大食懶，市民就吃虧。前朝政府懶懶閒唔做嘢吖嘛，老吾老以及人之老變成非常棘手嘅問題。現時退休保障只靠個人積蓄、強積金以及綜援三道板斧，大部分受訪者認為不足夠。四成七覺得政府應該研究推行全民退休保障制度；兩成七感到退休生活毫無保障；一成八直斥作用不大。
講到尾，又要勞煩新政府執手尾，前人留低百廢未舉嘅爛攤子，後人就要捱義氣收拾舊山河。計功夫茶話齋，梁振英政府係時候大展拳腳嘞，唔可以再好似前朝舊時一樣頭腦僵化，未雨綢繆對症下藥制訂人口政策，咁先至係波吖嘛！