善男信女一心以為做好事，有時候會選擇放生動物，例如放生烏龜，或者放生雀仔。功夫茶忽然有一個諗法，唔通淫賤黎係一隻人形烏龜？如果唔係，點解特區政府一次又一次放生呢一個淫媒大亨？
壹淫媒旗下其他刊物都唔講嘞，淨係睇睇免費派通街嘅鹹濕《爽報》，自從去年九月創刊以來，影視處短短幾個月就收到超過二百宗投訴，指摘內容不雅、淫褻同暴力等等。影視處將二十六件《爽報》發布嘅物品送審，當中二十三件被淫褻物品審裁處評定為不雅。你估影視處點樣處理吖嗱？佢哋只係提出十一項票控，其餘十二項網上文章聲音版全部放生。即使係票控十一罪，法官大人對於《爽報》都係呵護備至，每項罪名輕輕罰款一萬元算鬼數，合共罰款就係區區十一萬元。
對於咁唔合理嘅處理手法同判決結果，ontv評論台《就係敢講》請來嘉賓發表意見，城市大學專業進修學院學術統籌宋立功，以及淫審處前審裁員兼執業大律師龔靜儀異口同聲認為，法庭判罰過輕，變相助長不良傳媒違規，嚴重荼毒青少年，如果再唔正視，只會繼續遺禍社會。
其實，稍稍有理智嘅人都會覺得法庭判決極之有問題。首先，一條罪名罰款一萬元對於淫賤黎而言，簡直雞碎咁多啦，利用誨淫誨盜嘅《爽報》賣多兩個廣告已經除笨有精。其次，喂，連犯十一罪唔係應該累進計算罰款嘅咩？點可以每條罪名都係罰一萬咁少？情況就好似色魔積犯，今次強姦坐十年監，下次再犯坐二十年，死性不改甚至有可能終身監禁。
根據《淫褻及不雅物品管制條例》，但凡發放不雅物品，首次定罪最高罰款四十萬元及監禁一年，再犯可判罰款八十萬元及監禁一年。撇開《爽報》連犯十一罪吖，壹淫媒旗下刊物多年來累計違例百幾次，簡直係積犯之中嘅積犯，次次都係罰款一萬幾千，幾時見過重罰？幾時見過收監？冇吖嘛，咁咪即係特區政府刻意放生囉！
宋立功同龔靜儀講得好啱o架，《爽報》十二項網上文章聲音版全部不檢控好大問題，因為網上資訊容易瘋傳散播，一個屈尾十就成為青少年嘅私人珍藏，不但教壞細路，而且教壞其他不良傳媒有樣學樣走法律罅。
宋立功同龔靜儀亦認為，香港應該好似台灣咁嚴厲執法，對於壹淫媒違規犯例重重懲罰。之不過咁，台灣唔係香港，人哋冇港英餘孽助紂為虐吖嘛，唔似得香港咁姑息養奸，相關法例形同虛設。
計功夫茶話齋，對淫媒仁慈等於對公義殘忍，鹹濕《爽報》被放生，法治精神就快死！