「香江和珅」煲呔曾涉嫌官商勾結，利益輸送，醜聞愈爆愈多，港府廉政嘅神話被佢一手摧毀。其實，煲呔曾貪威識食，點止群埋富商黐飲黐食咁難睇，黐阿公攞納稅人着數，更加係舔到盡，貪到盡。
今次玩踢爆嘅唔係傳媒，而係審計署。原來，「離岸特首」煲呔曾成日豪花公帑周遊列國，上台以來總共出訪五十四次，使費超過一千萬元，而且離夠鐘收工愈近，飛得愈密，使得愈豪。呢，有數據為證，○七至○八年度佢啱啱上台，總共外訪六次，使費九十一萬元，反觀本年度未完已經出埠十次，費用超過四百萬元，等於佢一年人工。
最離譜嘅就係，煲呔曾使自己錢鬼咁孤寒，使公帑就鬼咁疏爽。同樣係去澳門，○九年因公出訪，兩日一夜平均每人使咗二千二百蚊；早排兩夫婦坐富商遊艇玩足三日兩夜，加埋至畀五百蚊咁大把，仲口口聲聲話係「市價」添。數口咁精，唔到你唔服。
喂喂喂，煲呔曾咪話要奮鬥至最後一分一秒，唔可以隨便離開崗位嘅，點解佢可以花蝴蝶咁四圍飛呢？蝴蝶四圍飛係為採蜜播粉，佢又為乜？台灣第一貪阿扁任內都好鍾意頻繁外訪，話就話係為台灣爭取國際生存空間喎，點知下台後被揭發成架飛機入面裝晒鈔票。煲呔曾號稱「香港阿扁」，會唔會同樣有蠱惑，只有佢自己先知。
仲有，特首辦編制不斷膨脹，人手由九七年嘅六十二人增加近倍至逾百人；開支升幅同樣驚人，董建華時代嘅預算約六千萬，煲呔曾一上台即刻加碼到近七千萬，今年度更加飆升到九千幾萬元。
如果增加人手同開支可以改善施政效率，納稅人都唔會反對，弊在事實啱啱相反。正如立法會議員葉劉淑儀話齋，煲呔曾做嘢「唔踏實」，特首辦超高人工請咗成班公關同政治化妝師，可惜愈化愈醜，煲呔曾嘅支持度就係咁插水！
唔講唔知，煲呔曾亂使公帑，特首辦亂咁請人，照計庫務局可以提出質疑，審計署可以作出監督，點解咁多年來都冇人理呢？好簡單，煲呔曾係香港土皇帝，審計署也好，庫務局又好，點敢太歲頭上動土。衡工量值廢武功，大內群丑無王管，作為煲呔曾禾蟲師爺嘅中央政策組一樣係狐假虎威，回歸以來從未接受過審計。
講到呢度，功夫茶有啲擔心。審計署署長鄧國斌冇膽查頂頭上司，同樣係煲呔曾下屬嘅廉政公署又點敢捋虎鬚吖。雖然老廉查案無數，仲打過幾隻老虎添，不過面對煲呔曾呢隻百獸之王，唔驚就假。一句講晒，煲呔曾濫權無王管，指望廉署調查，不如發動人民力量趕佢落台仲實際！