咦，最鍾意周遊列國嘅曾蔭權又去咗北京喎，交通工具會唔會又係富豪提供嘅私人飛機呀？希望唔係啦，否則香港嘅廉潔形象真係會被呢一個貪威識食嘅蠱惑香港仔進一步損毀到不堪入目。
即使今次唔係搭身價億億聲嘅私人飛機，煲呔曾其實已經係一個不折不扣嘅「曾小人」，舔盡大小便宜嘅方法五花八門，否則都唔會淪為驚蟄打小人嘅目標對象，搞到鵝頸橋殺聲四起。根據知情人士踢爆，曾蔭權任職高官以至特首期間多次公幹外訪，入住酒店嘅時候，同行官員一律由政府部門埋單，偏偏煲呔就堅持用個人信用卡簽帳，然後再由公帑退數，目的係賺取積分優惠。你知啦，信用卡積分一般可以得到禮品回贈甚至換取機票，同現金獲利冇乜分別o架咋！
好嘞，煲呔今次去北京，會唔會又係精甩辮出動呢一招碌卡墊支賺積分？就算唔係，功夫茶都好想知道，只認係信徒、唔認係賭徒嘅曾蔭權，有乜特權喺○七年入住澳門威尼斯人度假村酒店頂級套房Palazzo，盡享皇帝式奢華生活？呢一個幾千呎套房專為上落千萬元賭款嘅超級大豪客而設，房租一晚要兩萬幾元。煲呔話喎，租房係由細仔安排，佢做老竇嘅乜鬼都唔知o架。嗱嗱嗱，呢家嘢又係蠱惑香港仔本色，廉價租用「深圳禮賓府」就推落老婆身上，話要住大屋先至可以放得落第一夫人嘅衣物，特權租用澳門頂級套房咩，責任就推落細仔身上。難怪曾蔭權同唐英年咁老友啦，兩個冇腰骨又冇膊頭嘅港男都為求卸責而擺屋企人上枱，簡直令到男性同胞恥與為伍。
煲呔去北京其中一項行程係同就讀清華及北京大學嘅香港留學生以及內地學生會面，有學生會面後引述曾蔭權談話內容，話佢主動提到自己嘅個人問題，表示會返香港向港人解釋，希望市民諒解，仲話明白香港係力臻完美嘅地方。
解釋乜嘢呢？有乜好解釋？如果真係有誠意解釋，上次出席立法會答問大會就應該清清楚楚交代一切啦，冇必要鬼鬼祟祟連邊一個富豪提供奢華款待都諱莫如深。你愈係吞吞吐吐，人哋愈係覺得你的確有官商勾結同利益輸送。正如家陣有傳言，一名省級政協常委只不過送上幾隻雞同幾箱菜之嘛，已經可以獲委任為太平紳士並且獲頒勳章，幾鬼肉酸呀！
計功夫茶話齋，貪曾呀貪曾，解釋即係掩飾，貪婪嘴臉已經大白於世嘅閣下唔使諸多解釋，忍無可忍嘅香港人再冇耐性聽廢話。對於一連串貪腐問題，貪曾第一時間滾蛋落台先至係正確答案！