做官最緊要堂堂正正，光明正大，衰就要認，打就要企定。如果有鑊就卸，有問題就迴避，閃閃縮縮，鬼鬼祟祟，點取信於民吖！
呢，人稱周一鑊嘅食物及衞生局局長周一嶽就係咁鬼祟嘅喇。佢尋日出席一個公開活動時，場外有中港家庭團體請願，抗議當局「落閘」，一刀切拒絕港人內地配偶喺公立醫院分娩，要求同佢直接對話。點知周一鑊居然變咗縮頭烏龜，出入玩「走後門」，直情當請願人士冇到。
結果咯喎，示威人士忍無可忍，有人試圖衝入會場抗議，一度同保安員發生衝突，場面混亂，當中仲有大肚婆同小朋友添。但周一鑊繼續當睇唔到，你有你抗議，佢有佢開會做騷，會後粒聲唔出，從後門一走了之。事後佢仲反咬一啖，發表聲明譴責示威者行動過激，仲話深表遺憾喎。
冇錯，香港係理性及和平嘅社會，滋擾同衝擊公眾秩序呢種做法的確值得商榷。問題係，有因先至有果，如果周一鑊肯聽民意，積極回應示威人士嘅訴求，而唔係事不關己，一味卸膊，甚至做縮頭烏龜，又點會發生咁嘅事吖！正如示威團體話齋，周一鑊身為問責高官，面對咁多聲音同意見，竟然選擇逃避，完全係失職失責喇。
話時話，中港家庭團體已經接獲幾十個求助個案，當中大部分人都預約唔到公立或者私家醫院產科床位。好似參與請願嘅楊小姐咁，已經懷孕九個幾月，半年前去公立醫院預約床位被拒，去私家醫院生ＢＢ就要十幾萬，根本負擔唔起。佢話吖，如果當局唔監管收費，又未能提供分娩床位，唔排除要去醫院急症室「衝閘」生仔。
講來講去，今日呢種局面完全係港府一手造成嘅。內地孕婦逼爆公立醫院，當局但求自己做嘢方便，漠視港人內地配偶嘅需要，唔理三七二十一，實行一刀切限制所有內地孕婦來港分娩，港人內地配偶亦唔例外，結果引起中港家庭強烈反彈，抗議活動無日無之，搞到七國咁亂。
其實，如果當局行多一步，做多少少，分娩服務以父母都係港人、港人內地配偶，以及父母均非港人三種情況按先後次序劃分，何至於搞到咁嘅地步吖？好嘞，搞到一鑊泡之後，當局就要求私院預留名額接收中港家庭孕婦，將責任推晒畀對方，一廂情願要人哋執手尾，自己乜都唔做。
內地孕婦上次跪街攔車遞信請願，今次衝擊會場，第日去醫院急症室衝閘，你話怎收科。中港家庭團體抗議不斷升呢，咪話功夫茶唔提醒，問題唔會自動消失㗎，拖得愈耐抗議行動愈激烈，周一鑊係咪想拖到夕陽政府收工吖？