功夫茶愈來愈喜歡見到內地同胞放假，點解呢？當中有兩大原因，首先係內地同胞放假少不免會南下來港消費，咁就可以刺激經濟嘞。其次咯喎，內地同胞放假等於大量工廠停產，咁就可以減少污染嘞。
大家應該記得舊年下半年香港天氣特別好，失蹤時間長過維權藝術家艾未未嘅藍天白雲難得一見。之所以會出現呢一個迹近「天文奇景」嘅現象，無他嘅，廣州為咗主辦亞運而粉飾太平，勒令當地工廠限產甚至停產，又實施單雙號行車以及禁止食肆燒煤等等，所以咪減少空氣污染囉。不過可惜吖，亞運一過，故態復萌，家陣天空灰濛濛仍然非常之咁嚴重。
神州大地污染問題簡直係水陸空全方位為禍人間，先講講水吖，根據專家估計，長江流域每年排放嘅污水多達三百億噸，令下游六百公里近岸地區慘受污染。珠三角地區不遑多讓，每日未經處理嘅有毒工業廢水同重金屬直接排入下水道。就連香港人飲水思源嘅東江，亦多次被揭發有人將禽畜屍體同家居排放物直接掟落河。
浸會大學做過研究，本港街市出售來自珠三角水域嘅淡水魚甚至鹹水魚全部驗出含有致癌物質二噁英。綠色和平舊年亦發表報告，驗出長江沿岸嘅鯉魚同鯰魚含有壬基酚同辛基酚等等化學物質。
水源既然有污染，陸地自然不可免。肥水就話不流別人田啫，廢水會吖嘛。廢水流向別人田嘅後果就係農作物大受威脅，廣東省好多地方都已經不適宜耕種，供港菜場紛紛棄田北移，轉向韶關、雲南、山東以及遼寧等等冇咁惡劣嘅地方。大家唔好唔記得喎，農作物受污染之餘，仲有無良奸商大量炮製黑心食品，北上尋歡真係隨時禍從口入。
至於空氣污染，唔使多介紹啦，香港人日日夜夜親身體會。唯一要補充嘅係，中港兩地採用嘅空氣質素指標竟然係廿幾年前嘅陳皮產物，遠遠落後於世衞標準。簡單咁講，若然世衞認為空氣質素不可接受，香港會話可以接受，吹脹！
講咗咁耐，功夫茶最想講呢句，唔該國家領導人同曾蔭權政府諗諗辦法實行中港合作，大刀闊斧搞好環保。污染蔓延水陸空真係禍患無窮o架，係咪想害到炎黃子孫飲食難安呀？係咪想害到新一代中國人全部變番東亞病夫呀？作為世界工廠無疑賺錢係好重要，之不過賺錢賺到害人害己絕子絕孫就自作孽啦！
喂喂喂，曾蔭權已經有名你叫「氣候逃兵」，如果怠忽職守孭多一項罪名「環保敗家」，點對得住祖宗十八代呀！