有包搶！有包搶！唔係叫你去搶包山，而係一年一度長洲太平清醮出現平安包搶購熱潮！
你知啦，平安包呢家嘢係長洲太平清醮嘅傳統美食，遊客少不免入鄉隨俗買番幾個寓意闔府平安嘅包包。今年食環署唔知係咪天氣高溫熱壞腦，忽然之間非常高調咁掃場，向兩間大會指定製造平安包嘅餅店發出警告，話店舖門外蒸包以及容許遊客打印都係違反衞生規定，違者將被票控。
既然官老爺雷厲風行警告票控，平安包嘅生產工序大受影響，卒之產量急跌三成，搞到餅店同遊客都十分之咁掃興。物以罕為貴吖嘛，咁就導致平安包搶購熱潮嘞。其中一間餅店郭錦記乾脆拉閘罷賣平安包，以示抗議食環署無理刁難。
人哋年年都係咁賣平安包㗎啦，從來冇聽過有人食物中毒，食環署今年嘅做法係咪矯枉過正呢？計功夫茶話齋，呢家嘢正正係特區政府嘅施政特色，千秋大業管不了，民生小事管死了。關乎生死嘅醫療政策一塌糊塗，百年樹人嘅教育政策亂七八糟，哈，一話要趕絕小市民啫，官老爺即刻鬼打咁精神。
大家記唔記得雞蛋仔阿伯事件呀？撇開事主是否有詐騙綜援之嫌，人哋自食其力街邊擺檔賣雞蛋仔賺取蠅頭微利之嘛，食環署居然惡死騰騰頻密檢控，結果激起民憤群情洶湧。長洲平安包事件咪又係同出一轍囉，大官小吏口口聲聲話要打造旅遊盛事，實際只係埋頭苦幹針對小商舖。
以諷刺時弊見稱嘅飄色巡遊果然一針見血極之應棍，老師傅精心炮製「一旨錯滿城皆風雨」嘅飄色堪稱如實寫照。你曾蔭權政府拍拍腦袋一道聖旨掟出街，有邊一次唔係大錯特錯甚至超錯？好似財爺曾俊華前倨後恭唔派又派每人派六千銀咁吖，由頭到尾一錯再錯，咁咪搞到滿城皆風雨囉。
咦咦咦，飄色巡遊都有小朋友粉墨登場諷刺財爺亂派錢㗎，功夫茶畀你一隻手指公，讚！
唉，聽講今年長洲太平清醮人潮略減，可能同食環署掃興有關。所以話啫，長洲賣包真係畀佢管到死一死，一個小小平安包足以反映何解民怨愈積愈重。
好心高薪厚祿嘅官老爺要管就管大事啦，五花八門嘅內地黑心食品隨時攻陷城池喇，唔該食環署英明神武走去管一管。仲有呀，小販擺檔自食其力唔該你唔好要拉要鎖，認真考慮重新發牌規管好過啦。有冇聽過「水至清則無魚」呀？如果所有小販都消失得無影無蹤，呢啲唔係叫市容乾淨，只可以話係一座死城！