香港一方面通街都係劏客嘅黑店，另方面又大量潛伏伺機發惡嘅疑似導遊阿珍物體，牙尖嘴利強迫購物不遺餘力，規管旅遊業幾時先至改善呢？
唉，又係一字記之曰拖，特區政府死拖爛拖之下，去年底先至提出四個改革旅遊業規管架構方案，今年四月推出諮詢文件，諮詢期直至七月中，咁又唔知要拖到幾時先至會公布諮詢結果。你知啦，公布諮詢結果唔代表坐言起行，隨時再整你一鋪決而不行，吹脹！
就喺呢一個議而不決嘅漫長過程期間，本地旅遊業兩大龍頭忍唔住公開駁火嘞。旅遊發展局主席田北俊炮轟旅遊業議會「自己人管自己人」，香港屢屢爆出各種各樣嘅醜聞，令佢老人家蒙羞之餘，亦損害香港整體形象。田北俊警告業界，如果唔再改革只會自取滅亡。
維護業界利益嘅旅議會當然唔會罵不還口咁順攤，主席胡兆英死撐話喎，議會並非一無是處，內地客投訴已經開始減少，政府嘅諮詢文件唔等於拆議會招牌。
如果你問功夫茶，兩大龍頭誰對誰錯呀？功夫茶會咁樣答你，梗係田北俊有道理少少啦。喂，自己人管自己人從來都係無法彰顯公義嘅失敗模式，試問警方內部嘅投訴警察課幾時畀人感覺有公信力吖？田少講得啱呀，本身係商會嘅旅議會唔應該負責規管行業操守，正如銀行公會唔會管銀行，係由金管局去管！
講到呢度，功夫茶真係唔敢樂觀，官僚作風本來已經少做少錯、唔做唔錯，家陣仲屋漏更兼連夜雨。唔知係風水差定係犯太歲，病魔殺入官場搞到接二連三有高官打敗仗，其中一個正正係負責規管旅遊業嘅商務及經濟發展局局長劉吳惠蘭，前排因為罹患腸癌而辭職。好衰唔衰副局長蘇錦樑未夠班水鬼升城隍，局長一職懸空至今遲遲未物色到合適人選。喺現屆政府任期只剩一年幾嘅情況之下，加上局方群龍無首，你話嘞，落實規管旅遊業有乜可能唔係拖到下屆政府吖？所以咯喎，唔怪得田北俊扯火㗎。
不如咁嘞，功夫茶有一個大膽提議，田北俊索性毛遂自薦直接向曾蔭權要求擔任商務及經濟發展局局長，一旦成事咪大刀闊斧改革旅遊業囉。如果煲呔曾耍手擰頭又點呢？咁田少就要打蛇隨棍上，要求盡快物色局長着手改革，唔好畀機會疑似導遊阿珍物體破壞香港形象。
總而言之講到尾，改革旅業拖呀拖，耐性再好都扯火，官老爺若然放任劏客醜聞繼續傳千里，小心火燒後欄呀！