惡有惡報，時候已到！地下六合彩禍國殃民，天怒人怨，深圳警方前日展開大圍剿，成功摧毀一個跨境走私六合彩報同馬經嘅不法集團，為民除害，大快人心。
深圳警方今次嘅收穫就豐富咯，當場檢獲三萬幾份曾由淫賤黎旗下公司承印嘅六合彩報《創富》、《六合皇》、《貼士皇》，仲有幾千份爛果報馬經，行動中拉咗廿幾人，搗破咗一個地下錢莊。深圳警方今次威就威喇，不過咁，不法集團愈來愈猖狂，內地賭禍愈來愈嚴重，一次行動係唔可以解決根本問題嘅，所以呢，深圳方面要求港方協助，盡快緝捕本港犯罪分子。
係咯，不法集團橫跨兩地，佢哋一條龍作案，又車又船，分工合作，將港產彩報同馬經源源不絕走私北上，如果香港執法部門闊佬懶理，淨係靠深圳警方堵截，始終係嘥氣。正如內地當局話齋，不法分子為牟利不擇手段，偷運彩報同馬經入境，荼毒內地民眾，簡直係罪大惡極。
講到地下六合彩害人，三日三夜都講唔晒。喺港產彩報煽風點火、推波助瀾之下，近年內地賭風熾熱，賭禍蔓延全國，傾家蕩產、家散人亡嘅悲劇無日無之。有人債台高築，鋌而走險綁架勒索；有人輸光積蓄，跳樓自殺；更有官員輸到周圍借錢，以賣官為名招搖撞騙，事敗被通緝。唉，呢個害己、害人、害親友、害家庭、害民族、害國家嘅「六害彩」，可以講係罪惡之源。
其實，港產彩報害人不淺，早就應該拉人封艇喇，奇就奇在執法部門居然詐傻扮懵，任由呢啲彩報長期畀人走私北上，如入無人之境，搞到有啲地方甚至出現「六合彩報走廊」，大搖大擺公開販賣不特止，仲接受即場落注添。唔怪得有人質疑背後涉及官員包庇縱容，你都咪話冇可能。
罪惡無疆界，大家咪以為地下六合彩淨係荼毒神州為禍同胞吖，呢，本港警方日前喺油塘一個居屋單位搗破收受地下六合彩賭注中心，揭發內地莊家喺香港招攬「艇仔」，主要向屋邨師奶埋手。
話時話吖，彩禍回流香港，都係港府自作孽啫。嗱，早前有立法會議員要求當局關注港產六合彩報不斷走私進入內地，引發連串社會問題，保安局官員居然回應話，二○一○年頭十個月處理咗兩宗走私六合彩報個案喎。咁就好笑喇，走私六合彩報就算唔係日日發生，一個禮拜最少都有幾次喇，當局十個月先至處理兩宗咁大把，仲唔係失職？有人質疑背後涉及包庇甚至貪污，一啲都唔奇㗎。
無論如何，宜將剩勇追窮寇，不可沽名學霸王。呢次深圳警方大舉圍剿跨境走私六合彩報同馬經嘅不法集團，固然大有斬獲，但最緊要持之以恒，繼續追查到底，尤其係擒賊必須先擒王，盡快挖出幕後黑手，先至可以斬草除根，杜絕賭禍！